كاسپيدە قىرىلعان يتبالىقتاردىڭ سانى 80 گە جۋىقتادى
اقتاۋ. KAZINFORM - كاسپي تەڭىزىنىڭ جاعالاۋىنا مونيتورينگ جۇرگىزۋ بارىسىندا تابىلعان يتبالىقتاردىڭ ولەكسەسىنىڭ قاتارى ارتتى.
31-ناۋرىزدا ينسپەكتسيا قىزمەتكەرلەرى جەرگىلىكتى اتقارۋشى ورگانمەن بىرلەسىپ، كاسپي تەڭىزىنىڭ جاعالاۋىن قاراۋ كەزىندە 16 ءولى يتبالىقتىڭ ولەكسەلەرىن تاپتى. ال 1-ساۋىرىندەگى جاعداي بويىنشا ءولى يتبالىقتاردىڭ جالپى سانى 78 گە جەتىپ وتىر.
بۇعان دەيىن ماڭعىستاۋ وبلىسى بويىنشا بالىق ينسپەكتسياسى باسقارماسىنىڭ قىزمەتكەرلەرى جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ وكىلدەرىمەن ءتۇپقاراعان اۋدانىنداعى كاسپي تەڭىزىنىڭ جاعالاۋىنا مونيتورينگ جۇرگىزۋ بارىسىندا 62 ءولى يتبالىقتىڭ ولەكسەلەرىن تاپقانىن مالىمدەگەن بولاتىن.
شۇعىل تۇردە يتبالىقتار تابىلعان جەرگە جايىق-كاسپي وبلىسارالىق بالىق شارۋاشىلىعى باسسەيندىك ينسپەكتسياسى، ماڭعىستاۋ وبلىسى بويىنشا ەكولوگيا دەپارتامەنتى، كاسپي يتبالىعىن زەرتتەۋ جانە وڭالتۋ ورتالىعى، ۆەتەرينارلىق ستانتسيا جانە جەرگىلىكتى اتقارۋشى ورگاندار وكىلدەرىنەن تۇراتىن جۇمىس توبى وقيعا ورنىنا اتتاندى.
قازىرگى ۋاقىتتا ماڭعىستاۋ وبلىسى بويىنشا ەكولوگيا دەپارتامەنتى سۋ سىنامالارىن العان. ال كەتەريناريالىق ستانسيا قىزمەتكەرلەرى ىشكى اعزالاردىڭ تىندەرىن (باۋىر، وكپە)، ال كاسپي يتبالىعىن زەرتتەۋ جانە وڭالتۋ ورتالىعى ازۋ تىستەرىن، تىرناقتارىن جانە جۇنىنە ءتيىستى زەرتحانالىق زەرتتەۋلەر جۇرگىزىپ جاتىر.
سونىمەن قاتار جەرگىلىكتى اتقارۋشى ورگاندار، مامانداندىرىلعان عىلىمي ۇيىمدار، كاسپي يتبالىعىن زەرتتەۋ جانە وڭالتۋ ورتالىعى، گيدروبيولوگيا جانە ەكولوگيا ينستيتۋتى، قازاقستاندىق قولدانبالى ەكولوگيا اگەنتتىگى، ميكروبيولوگيا جانە ۆيرۋسولوگيا عىلىمي-وندىرىستىك ورتالىعى، وبلىستىڭ ۆەتەريناريالىق قىزمەتى، ەكولوگيا جانە پوليتسيا دەپارتامەنتتەرى، تابيعات قورعاۋ پروكۋراتۋراسىنان قۇرالعان جۇمىس توبىنىڭ بارلىق مۇشەلەرى جەدەل تۇردە حاباردار ەتىلدى.
ءتۇپقاراعان اۋداندىق اكىمدىگى وسىعان دەيىن تابىلعان 40 يتبالىقتىڭ ولەكسەسىن جويۋ جۇمىستارىن جۇرگىزسە، تاعى 22 دانا يتبالىق سىناما الۋ ءۇشىن ساقتالىپ وتىر.
«تابىلعان ولەكسەلەردە فيزيكالىق زاقىم انىقتالعان جوق. يتبالىقتار تابىلعان جەرگە الماتى قالاسىنداعى گيدروبولوگيا جانە ەكولوگيا ينستيتۋتىنىڭ عالىمدارى كەلدى. ولار بۇگىندە تابىلعان ۇشالاردان ءتيىستى زەرتحانالىق زەرتتەۋلەر جۇرگىزۋ ءۇشىن ىشكى اعزالاردىڭ تىندەرىن (باۋىر، وكپە)، سونداي-اق ازۋ تىستەردى، تىرناقتار مەن ءجۇندى ءىشىنارا ىرىكتەۋدە»، - دەدى بالىق شارۋاشىلىعى كوميتەتىنىڭ باسپا ءسوز قىزمەتى.
قازىرگى ۋاقىتتا جايىق-كاسپي وبلىسارالىق باسسەيندىك بالىق شارۋاشىلىعى ينسپەكسياسىنىڭ قىزمەتكەرلەرى كاسپي تەڭىزىنىڭ جاعالاۋ ايماعىنىڭ مونيتورينگىن جالعاستىرىپ جاتىر.
