كاسپي تۇبىندە سالىناتىن تالشىقتى-وپتيكالىق بايلانىس جەلىسىنىڭ قۇرىلىسى قاشان اياقتالادى
الماتى. KAZINFORM - قازاقستان مەن ازەربايجاننىڭ بىرلەسكەن جوباسى اياسىندا كاسپي تەڭىزىنىڭ تۇبىنە تالشىقتى-وپتيكالىق جەلى تارتىلادى.
«قازاق تەلەكوم» اكسيونەرلىك قوعامىنىڭ يننوۆاتسيالار جونىندەگى باس ديرەكتورى نۇرلان مەيىرمانوۆتىڭ ايتۋىنشا، كاسپي تەڭىزىنىڭ تۇبىندە تارتىلاتىن تالشىقتى-وپتيكالىق بايلانىس جەلىسىنىڭ قۇرىلىسى 2026-جىلدىڭ ەكىنشى جارتىجىلدىعىندا اياقتالادى.
- بىزدە كەلىسىمشارتتىڭ ءاربىر قۇرامداس بولىگى بويىنشا ناقتى بەكىتىلگەن جوسپار بار. نەگىزگى كەزەڭدەر - تەڭىزدى زەرتتەۋگە قاجەتتى رۇقساتتاردى الۋ، كابەلدىك ديزايندى رەتتەۋ جانە ونى ءوندىرۋ. ءبىز بۇل مىندەتتەردى بيىل اياقتاۋدى جوسپارلاپ وتىرمىز، - دەپ جاۋاپ بەردى ول جۋرناليستەردىڭ سۇراعىنا.
لوگيستيكا كەلەسى جىلعا جوسپارلانىپ وتىر.
- كابەلدى قازاقستانعا جەتكىزۋ - جۇكتىڭ كولەمى جاعىنان دا، سالماعى جاعىنان دا كۇردەلى پروتسەسس. تەڭىزگە شىعىپ، توسەۋدى باستاۋعا ءبارى دايىن بولعاندا، جازدا كابەلدىك جۇيەنىڭ ءوزىن ورنالاستىرۋدى جوسپارلاپ وتىرمىز. كەلەسى كەزەكتە وپتيكالىق جۇيەلەردى دايىنداۋ جانە ارنا ينفراقۇرىلىمىن ىسكە قوسۋ جۇمىستارىن باستايمىز. 2026-جىلدىڭ ەكىنشى جارتىجىلدىعىندا ىسكە قوسۋعا دايىن بولامىز، - دەپ اتاپ ءوتتى نۇرلان مەيىرمانوۆ.
بۇعان دەيىن «قازاق تەلەكوم» مەن «AzerTelecom» ترانسكاسپي جوباسى بويىنشا ستراتەگيالىق قۇجاتقا قول قويعانى تۋرالى جازعان ەدىك.
سيفرلىق ينفراقۇرىلىم جوباسى اياسىنداعى ترانسكاسپي تالشىقتى-وپتيكالىق بايلانىس جەلىسى ترانزيتتىك قابىلەتتى كەڭەيتىپ، جاڭا نارىقتارعا شىعۋعا مۇمكىندىك بەرەدى.
