كانادالىقتار اسىراپ العان جىگىت 17 جىلدان كەيىن اناسىن ىزدەپ، ەلگە كەلدى
استانا. KAZINFORM - وسىدان 17 جىل بۇرىن كاناداعا كەتكەن جاندوس رەين اقتاۋعا كەلىپ، اناسىمەن قاۋىشتى، - دەپ حابارلايدى «ماڭعىستاۋ» وبلىستىق تەلەارناسى.
جاندوستى اسىراپ العان ايەل ونىڭ كۇتۋشىسىن بىردەن تانىدى. ايەلدىڭ ايتۋىنشا، بالا ول كەزدە 10 ايلىق بولعان.
«كىشكەنتاي كەزىنەن جاندوسقا ونى اسىراپ العانىمىزدى ايتىپ كەلدىك. «تۋعان اناسىن كورگىسى كەلە مە، جوق پا؟» ونى ءوزى شەشەدى دەپ كەلدىك. ول تورونتودا قازاق دوستارىمەن ءجيى كەزدەسىپ، ارالاسىپ تۇرادى. 17 جاسقا تولعاندا دوستارى دا اناسىن تابۋعا كەڭەس بەرگەن. ءبىز ونىڭ نيەتىن قولدادىق. «شەتەلدەگى قازاق بالالارى» باعدارلاماسىنىڭ اۆتورى جانار بايسەمىزگە حابارلاستىق. ول كىسىنىڭ ارقاسىندا جاندوستىڭ اناسىن تاپتىق. كەشە عانا اقتاۋعا كەلىپ، جاندوستىڭ تۋعان اناسىمەن كەزدەستىك»، - دەيدى جاندوستى اسىراپ العان اناسى شاناس مۇحامەد.
جاندوس ەلگە كەلگەن بويدا اناسىمەن، تۋعان باۋىرلارىمەن قاۋىشىپ، ءوزى تاربيەلەنگەن سابيلەر ۇيىنە بارعان.
«انام مەنەن كوز جازىپ قالسا دا، تاستاپ كەتسە دە وعان وكپەم جوق. انامدى جازعىرعىم كەلمەيدى. كەرىسىنشە، بولاشاققا كوز تاستايمىن، ەكەۋمىزدىڭ تاعدىرىمىز سونداي بولدى. ەگەر مەنى كاناداعا الىپ كەتپەگەندە، سول جاقتا وسپەگەندە، قازىرگى قىرلارىم اشىلماس پا ەدى؟ مەنى بارلىعى كەرەمەت قارسى الدى. مەنىڭ حالقىم، ۇلتىم قوناقجاي ەكەن»، - دەيدى جاندوس رەين.
يتاليان، فرانسۋز، نەمىس تىلدەرىندە ءان سالاتىن جاندوس بيىل كونسەرۆاتورياعا قابىلدانعان.
