قوسشى قالاسى قارقىندى دامىپ كەلەدى
قوسشى قالاسىندا قوعامدىق مادەني- سپورت ورتالىعىنىڭ العاشقى كىرپىشى قالاندى. شاراعا اقمولا وبلىسىنىڭ اكىمى مارات احمەتجانوۆ قاتىستى. ەندى مۇنداعى مىڭعا تارتا تۇرعىننىڭ سالاۋاتتى ءومىر سالتىن ۇستانۋعا، سپورتپەن شۇعىلدانۋىنا مۇمكىندىك تۋماق.
ءىسساپار اياسىندا ايماق باسشىسى ءبىرقاتار قۇرىلىس نىسانىمەن تانىستى. ولاردىڭ ءبىرى - سىيىمدىلىعى 1000 ادامعا ارنالعان 2 قاباتتى مادەني- سپورت كەشەنى. ورتالىقتا كينوتەاتر، كىتاپحانا، شىعارماشىلىق ستۋديالار، سپورتتىق ۇيىرمەلەر بولادى. ول 2025 -جىلعا دەيىن قولدانىسقا بەرىلەدى دەپ جوسپارلانىپ وتىر. جالپى قۇنى 9 ميلليارد تەڭگەنى قۇرايدى.
قالا قارقىندى دامىپ كەلە جاتىر. قازىرگى سانى 80 مىڭعا جاقىنداپ قالدى. قوسشى قالاسىنىڭ دامۋىنا مەملەكەتتەن 12 ميلليارد تەڭگەدەن استام قاراجات بولىنگەن. قارجىنىڭ 9 ميللياردقا جۋىعى يگەرىلدى. ونىڭ كوپ بولىگى جولدار مەن مەكتەپتەر سالۋعا جۇمسالعان.
گايدار قاسەنوۆ، قوسشى قالاسىنىڭ اكىمى:
- بيىلعى جىلى ءبىز 2 مەكتەپتى قولدانىسقا بەردىك. ونىڭ ءبىرى جەكە ينۆەستيتسيالار ەسەبىنەن، ياعني بولات وتەمۇراتوۆ قورىنىڭ ەسەبىنەن سالىنعان 1500 ورىنعا ارنالعان مەكتەپ، وندا ەكى اۋىسىمدا 2 مىڭنان استام بالا وقيدى. قالادا بۇرىنعىداي ءۇش اۋىسىمدىق ءبىلىم بەرۋ دەگەن جوق. سونداي- اق قوسشى قالاعا اينالعالى مۇندا ەلەكتر، سۋ، جىلۋ، كارىز جەلىلەرىنە جۇكتەمەلەر كوپ. ءبىراق بىزدە قالانىڭ قاجەتتىلىگىن قاناعاتتاندىرۋ ارنالعان ينفراقۇرىلىمدىق جوبالار بار.
شاھار باسشىسىنىڭ ايتۋىنشا، الداعى ۋاقىتتا 40 مەگاۆاتتى ەكىنشى قوسالقى ستانسيا ورنالاسادى. سونداي- اق جەكە ينۆەستورلاردىڭ قاراجاتىنا جاڭا گاز قازاندىعىن سالۋ بويىنشا دا جوبا ازىرلەنىپ جاتىر.
www.24.kz
