كانادالىق اقىن گازاداعى جاعدايعا بايلانىستى اقۇيدەگى مەرەكەگە بارۋدان باس تارتتى
كانادالىق اقىن رۋپي كاۋر بايدەن اكىمشىلىگىنىڭ يزرايل مەن حاماس اراسىنداعى سوعىسقا رەاكسياسىنا نارازىلىق رەتىندە اقۇيدەگى ديۆالي مەرەكەسىنە بارمايتىن بولدى، دەپ حابارلايدى Kazinform BBC- گە سىلتەمە جاساپ.
الەۋمەتتىك جەلىدەگى جازباسىندا كاۋر بەيبىت تۇرعىنداردى ۇجىمدىق جازالاۋدى قولدايتىن كەز كەلگەن مەكەمەنىڭ شاقىرۋىنان باس تارتاتىنىن جازعان. ول سونداي- اق وڭتۇستىك ازيانىڭ باسقا دا تۇرعىندارىن ا ق ش ۇكىمەتىن جاۋاپقا تارتۋعا شاقىردى.
ديۆالي مەرەكەسى 8-قاراشادا وتەدى. ونى بۇل ەسكەرتۋلەرگە ءالى ەشقانداي تۇسىنىك بەرمەگەن ۆيتسە- پرەزيدەنت كامالا حارريس وتكىزەدى.
ءۇندىستاندا دۇنيەگە كەلگەن اقىن، «ءسۇت پەن بال» كىتابىنىڭ اۆتورى كاۋر اقۇي اكىمدىگىنىڭ ۇندىلەردىڭ وت فەستيۆالى - ديۆالي مەرەكەسىن تويلاۋى اقىلعا قونىمسىز دەپ ەسەپتەيدى.
رۋپي گازاداعى جاعدايعا بايلانىستى اقۇيگە بارۋدان باس تارتىپ قانا قويماي، ا ق ش ۇكىمەتىن «پالەستينالىقتارعا قارسى گەنوتسيدتى» اقتاپ جاتىر دەپ ايىپتادى.
