جىلقى ەتى مەن قوي ەتىنە قانشا سۋبسيديا تولەنەدى

- بۇعان دەيىن مال تۇقىمىن اسىلداندىرۋعا سۋبسيديا بەرىلىپ كەلدى. 100 مال بولسا، ءار باسىنا 10 مىڭ تەڭگەدەن بەردىك. ءبىراق بۇل جەردە قارىمتا مىندەتتەمە قاراستىرىلماعان. 100 سيىردان 10 بۇزاۋ الساڭ دا، 80 بۇزاۋ الساڭ دا بىردەي سۋبسيديا تولەنەدى. بۇل ەندى مەملەكەتتىڭ اقشاسىن دالاعا شاشۋ دەر ەدىم. سوندىقتان بۇدان كەتۋ كەرەك. ءبىز ونى ەتكە اۋىستىرىپ جاتىرمىز. ءار ەت كومبيناتىنا نەمەسە بورداقىلاۋ الاڭىنا وتكىزگەن مال سالماعىنىڭ ءار كەلىسىنە سۋبسيديا بەرەمىز. قاي كومبيناتقا قانشا ەت وتكىزىلگەنىن ناقتى تەكسەرىپ وتىرۋعا بولادى. ال مال تۇقىمىن اسىلداندىرۋعا بەرىلگەن سۋبسيديانى ولاي تەكسەرۋ مۇمكىن ەمەس. سوندىقتان كوپ ءىس قوزعالىپ جاتىر، - دەدى ول.

سونداي-اق، ول الداعى ءبىر ايدىڭ ىشىندە مال وسىرەتىن فەرمەرلەرگە 5 پايىزدىق نەسيە بەرۋ ماسەلەسى ناقتى شەشىمىن تاباتىنىن ايتتى.

- ءبىز ولارعا 5 پايىزدىق جەڭىلدەتىلگەن نەسيە بەرەمىز. بيىل العاش رەت بەرىلگەلى وتىر. جالپى قازاقستان بويىنشا 50 ميلليارد تەڭگە بولمەكشىمىز. ونى دا الەۋمەتتىك-كاسىپكەرلىك كورپوراتسيالار ارقىلى، اگرونەسيە كورپوراتسياسى ارقىلى الۋعا بولادى. ءبىر ايدىڭ ىشىندە وسىنداي شەشىم قابىلدانادى دەپ ويلايمىز، - دەدى ول.

«جىلقى ەتىنە، سيىر ەتىنە، قۇس ەتىنە، قوي ەتىنە، شوشقا ەتىنە نەشە تەڭگەدەن ليميت بەلگىلەيسىزدەر» دەپ سۇرادى جۋرناليست.

مينيستر ەت سۋبسيدياسى شارۋاشىلىقتىڭ بۇل تۇرلەرىنە دە قاراستىرىلعانىن ايتتى. ءبىراق مولشەرلەمەسى ءالى ناقتىلانباعان.

- مىسالى، سيىر ەتىن بورداقىلاۋ الاڭىنا نەمەسە ەت كومبيناتىنا كيلوگرامىن 1100 تەڭگەدەن وتكىزسە، سونىڭ 200 تەڭگەسىن مەملەكەت تولەيدى. قوي ەتىنە دە، جىلقى ەتىنە دە وسىلاي تولەنەدى. ءبىراق ءار كيلوگرامعا قانشا بولاتىنىن وسى ءبىر ايدىڭ ىشىندە ناقتىلايمىز. بۇل جەردە بۇكىل ەت كومبيناتى تەكسەرۋگە الىنادى. بار-جوعى 172 ەت كومبيناتى بار. ال مالمەن اينالىساتىن شارۋاشىلىقتاردىڭ سانى - 300 مىڭ. سوندىقتان وسى جۇيەمەن تەكسەرۋ جەڭىل، - دەدى ايداربەك ساپاروۆ.

سونداي-اق، بۇگىن ەنەرگەتيكا مينيسترلىگى كوكتەمگى ەگىس ماۋسىمىنا ديزەل باعاسىن ۇسىندى. سونىمەن قاتار ا ش م باسشىسى مال شارۋاشىلىعىنا سۋبسيديا بەرۋدى توقتاتىلۋى مۇمكىن ەكەنىن ايتقان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى