جەڭىلدەتىلگەن نەسيە الاتىن اۋىلدار سانى 3500 دەن 4000 عا وسەدى
استانا. KAZINFORM - ۇلتتىق ەكونوميكا ءمينيسترىنىڭ ورىنباسارى باۋىرجان وماربەكوۆ اۋىلدى دامىتۋعا ارنالعان جەڭىلدەتىلگەن نەسيەلەردى الۋعا حاقىلى اۋىلداردىڭ سانىن كوبەيتۋ جوسپارلانىپ وتىرعانىن ايتتى.
- «اۋىل اماناتى» باعدارلاماسى بويىنشا 2025 -جىلى 50 ميلليارد تەڭگە ءبولىنىپ، جوبالار ىسكە اسىرىلادى. بۇعان دەيىن وسى باعدارلامانىڭ اكىمشىسى اۋىل شارۋاشىلىعى مينيسترلىگى بولسا، ۇكىمەت دەڭگەيىندە ونى ۇلتتىق ەكونوميكا مينيسترلىگىنە بەرۋ تۋرالى شەشىم قابىلداندى، - دەدى ول ماجىلىستەگى دوڭگەلەك ۇستەلدە.
ۆيتسە- مينيستر پرەزيدەنتتىڭ تاپسىرماسى بويىنشا «اۋىل - ەل بەسىگى» جانە «اۋىل اماناتى» باعدارلامالارىن بىرىكتىرىلەتىن ەسكە سالدى.
- «اۋىل - ەل بەسىگى» باعدارلاماسىندا ىرىكتەلگەن 3500 اۋىلمەن عانا جۇمىس ىستەگەن ەدىك. بۇدان بىلاي باسقا اۋىلدارعا نەسيە بەرمەيمىز دەگەن پوزيتسيانى ۇستانا المايمىز. ويتكەنى قالعان 2800 گە جۋىق اۋىلعا دا قولداۋ كەرەك. دەگەنمەن باسىم باعىت دامۋ الەۋەتى جوعارى ەلدى مەكەندەردە بولادى. قازىرگى 3500 اۋىلدىڭ تىزبەسىن قايتا قاراپ شىعۋىمىز كەرەك شىعار. بۇعان دەيىن حالىق سانىنا ءمان بەرىپ وتىرساق، ەندى ەكونوميكالىق الەۋەتىنە كوبىرەك نازار اۋدارامىز. ياعني، بۇرىن 3500 اۋىل بولسا، ەندى بالكىم 4000 عا جەتكىزەتىن شىعارمىز، - دەدى باۋىرجان وماربەكوۆ.
ەسكە سالساق، ۆەدومستۆونىڭ بۇعان دەيىن بەرگەن دەرەگى بويىنشا، كەيىنگى ون جىلدا قازاقستان كارتاسىنان 572 اۋىل جويىلعان.
