جىل سايىن 100 ميلليون گەكتار شۇرايلى جەر جارامسىز تەرريتورياعا اينالادى
بۇگىن وزبەكستاننىڭ سامارقان قالاسىندا ب ۇ ۇ- نىڭ شولەيتتەنۋمەن كۇرەس جونىندەگى كونۆەنتسياسىن (CRIC 21) ىسكە اسىرۋدى قاداعالاۋ كوميتەتىنىڭ 21-سەسسياسى باستالدى، دەپ حابارلايدى Kazinform مەنشىكتى ءتىلشىسى.
اۋقىمدى شاراعا 196 ەلدەن 500 گە جۋىق دەلەگات قاتىسىپ جاتىر. ايتا كەتەيىك، بۇل - شولەيتتەنۋمەن كۇرەس كونۆەنتسياسىنا قول قويعان ەلدەردىڭ العاشقى كەزدەسۋى.
سەسسيادا ءسوز العان وزبەكستان رەسپۋبليكاسى ولي ءماجىلىسى سەناتىنىڭ ءتوراعاسى تانزيلا ناربايەۆا پرەزيدەنت شاۆكات ميرزيەيەۆتىڭ وتىرىس قاتىسۋشىلارىنا ارناعان حاتىن وقىپ بەردى.
«وزبەكستان جانە تۇتاستاي العاندا ورتالىق ازيانىڭ بۇكىل وڭىرلەرى كليماتتىق وزگەرىستىڭ اسا اۋىر زاردابىن تارتىپ وتىر. شاڭدى داۋىلداردىڭ گەوگرافياسى كەڭەيىپ، اۋا مەن جەردىڭ ساپاسى ايتارلىقتاي ناشارلاپ، سۋ قورى ازايدى، فلورا مەن فاۋنانىڭ ەرەكشە تۇرلەرى جوعالدى. بۇگىن ءبىز ءبۇتىن ءبىر ۇرپاقتىڭ كوز الدىندا جويىلىپ بارا جاتقان ارال تەڭىزى جاھاندىق اپاتىنىڭ اۋىر سالدارىمەن كۇرەسىپ كەلەمىز. وسى قاۋىپتەر جانە وزگە دە كوپتەگەن فاكتورلار ءبىزدىڭ ءوڭىردىڭ عانا ەمەس، بۇكىل الەم حالقىنىڭ ءال-اۋقاتى مەن دەنساۋلىعىنا تىكەلەي اسەر ەتەدى. سوندىقتان ورنىقتى دامۋدى قامتاماسىز ەتۋ ءۇشىن بىرلەسە كۇش جۇمساپ، ارىپتەستىكتى نىعايتۋ قاجەت»، - دەلىنگەن شاۆكات ميرزيەيەۆتىڭ فورۋم قاتىسۋشىلارىنا ارناعان حاتىندا.
سونداي-اق، فورۋمعا قاتىستقان ب ۇ ۇ- نىڭ شولەيتتەنۋمەن كۇرەس جونىندەگى كونۆەنتسياسىنىڭ اتقارۋشى حاتشىسى يبراگيم تياۋ 2015-جىلدان بەرى 4 ميلليون شارشى شاقىرىم شۇرايلى جەر جارامسىز تەرريتورياعا اينالعانىن ايتتى.
«بۇكىل الەمدە قۇرعاقشىلىق، دالا ورتتەرى جانە جاھاندىق جىلىنۋ دەڭگەيىنىڭ كۇرت ارتقانىن بايقاپ وتىرمىز. 2015-جىلدان باستاپ شامامەن 4 ميلليون شارشى شاقىرىم ساۋ ءارى شۇرايلى جەر جارامسىز بولىپ قالدى. مىسال ءۇشىن، بۇل اۋماق ورتالىق ازيانىڭ الىپ جاتقان تەرريتورياسىنا تەڭ. جىل سايىنعى شىعىن - شامامەن 100 ميلليون گەكتار. سوندىقتان قازىرگى تەندەنتسيالاردى ساقتاي وتىرىپ، 2030-جىلعا قاراي 1,5 ميلليارد گەكتار جەردى قالپىنا كەلتىرۋ قاجەت بولادى»، - دەپ ءمالىم ەتتى يبراگيم تياۋ.
وزبەكستاننىڭ ەكولوگيا، قورشاعان ورتانى قورعاۋ جانە كليماتتىڭ وزگەرۋى ءمينيسترى ازيز ابدۋحاكيموۆ بولسا جەردىڭ شولەيتتەنۋىن توقتاتۋ جۇمىسى ناتيجە بەرە باستاعانىن ءسوز ەتتى.
«كليماتتىڭ وزگەرۋى مەن ادامي فاكتوردان بولعان تەرىس سالدار تابيعاتقا جاناشىرلىقپەن قاراۋ قاجەتتىگىن ۇعىندىرىپ وتىر. قورشاعان ورتانى قورعاۋ - وزبەكستان ۇكىمەتىنىڭ باستى ستراتەگيالىق باسىمدىقتارىنىڭ ءبىرى سانالاتىنىن اتاپ وتكىم كەلەدى. ءبىز جەر دەگراداتسياسىن توقتاتۋعا تىرىسىپ جاتىرمىز جانە العاشقى ناتيجە دە جامان ەمەس»، - دەدى ازيز ابدۋحاكيموۆ.
ايتا كەتسەك، ب ۇ ۇ- نىڭ شولەيتتەنۋگە قارسى كونۆەنتسياسى قۋاڭشىلىق، جەر دەگراداتسياسى جانە قۇرعاقشىلىقپەن بىرلەسە كۇرەسۋ ءۇشىن قابىلدانعان.
ول 196 ەلدى قامتيدى.
كونۆەنتسيا 1994-جىلى 17- ماۋسىمدا پاريجدە وتكەن ب ۇ ۇ قورشاعان ورتا جانە دامۋ كونفەرەنتسياسىنىڭ ناتيجەسىندە قابىلدانعان.
