جىلۋ ەلەكتر ورتالىقتارىن سالۋدا تاڭداۋ نەلىكتەن رەسەيگە ءتۇستى - ساتقاليەۆتىڭ تۇسىندىرمەسى
ەنەرگەتيكا ءمينيسترى الماسادام ساتقاليەۆ كوكشەتاۋ، سەمەي جانە وسكەمەن جىلۋ ەلەكتر ورتالىقتارىن سالۋ ءۇشىن تاڭداۋ نەلىكتەن رەسەيگە ءتۇسىپ وتىرعانىن ايتتى، دەپ حابارلايدى Kazinform.
«ءوزارا تۇسىنىستىك تۋرالى مەموراندۋمعا قول قويدىق. قۇجات قازاقستاندا جىلۋ ەلەكتر ورتالىعىن سالۋعا ءوزارا مۇددەلىكتى بەكىتەدى. ەلەكتر ەنەرگەتيكاسى سالاسىن دامىتۋ جوسپارىنا سايكەس، كوكشەتاۋ، سەمەي جانە وسكەمەندە ج ە و سالۋ كوزدەلگەن. بۇعان دەيىن مينيسترلىك اشىق ينۆەستيتسيالىق تەندەر نەگىزىندە اتالعان ستانسالاردىڭ قۇرىلىسىنا قاتىستى جۇمىس جۇرگىزگەن ەدى. تەندەرلەر وتكەن جوق»، - دەدى مينيستر اقوردادا ب ا ق وكىلدەرىنە بەرگەن سۇحباتىندا.
ونىڭ ايتۋىنشا، اتالعان نىسانداردى سالۋعا نيەت تانىتقان ينۆەستورلار تابىلماي وتىر.
«اتالعان ج ە و- لار كومىرمەن جانە گازبەن جۇمىس ىستەۋى ءتيىس بولۋىنا بايلانىستى ءبىرشاما ماسەلە بار. بۇل رەتتە ول كومىرمەن جۇمىس ىستەيتىندىكتەن حالىقارالىق قارجى ينستيتۋتتارى قارجىلاندىرۋعا دايىن ەمەس. شىعارىندىلارعا، ياعني قورشاعان ورتانى قورعاۋعا قاتىستى بارىنشا قاتاڭ تالاپ قويدىق. اتالعان كونكۋرستارعا قاتىسۋعا، ءوز تاراپتارىنان قارجىمەن قامتاماسىز ەتۋگە دايىن ەلدەردىڭ كوپ بولماۋىنا بايلانىستى وسى مەموراندۋمعا قول قويدىق جانە رەسەي تاراپىنىڭ قازاقستاندا ءىرى ج ە و سالۋ پروتسەسىنە قاتىسۋعا مۇددەلىلىگىن بەكىتتىك. ءبىز قۇرىلىستىڭ باستان- اياق سالىعانىنا قىزعۋشىلىق تانىتامىز. ياعني، باس مەردىگەر تەك سالىپ قانا قويماي، پايدالانۋعا بەرۋ، ىسكە قوسۋ جانە رەتكە كەلتىرۋ جۇمىستارىن قامتاماسىز ەتۋى قاجەت. ناتيجەسىندە ءبىز قازاقستاننىڭ ەكولوگيالىق، تەحنيكالىق، ەكسپلۋاتاۋيالىق ستاندارتتارىنا ساي جۇمىس ىستەيتىن ەنەرگەتيكالىق نىسان الۋىمىز قاجەت. قازىر باستاپقى ساتىسى بولعاندىقتان ازىرشە، سوماسىن ايتا المايمىن. ەگەر، جىلدىڭ سوڭىنا دەيىن ۇكىمەتارالىق كەلىسىمگە قول قوياتىن بولساق، وندا تىڭعىلىقتى جوبالاۋعا كەزەڭىنە شامامەن جارتى جىل كەتەدى دەپ ويلايمىن. مەنىڭشە، كەلەسى جىلى قۇرىلىس جۇمىستارىنا كىرىسەتىن شىعارمىز»، - دەدى الماسادام ساتقاليەۆ.
وسى ورايدا مينيستر ج ە و سالۋ ءۇشىن نەلىكتەن تاڭداۋ رەسەيگە تۇسكەندىگىن ءتۇسىندىردى.
«ءبىز بىرنەشە مارتە كونكۋرس وتكىزدىك. ءبىراق، ەشكىم قىزىعۋشىلىق تانىتپادى. بۇل ۇسىنىستى نيەتتەستىك تۇرعىسىنان قاراستىرامىز. كەلىسسوزدەر ءساتتى اياقتالعان جاعدايدا ءدال وسى رەسەيلىك مەردىگەرلەرمەن جوبانى جۇزەگە اسىرۋعا كوشۋگە مۇمكىندىك بولادى. رەسەيلىك تاراپ ۇسىنىسىنىڭ باسىمدىعى - بۇل قارجىلاندىرۋعا، ۇزدىك تەحنولوگيالاردى ۇسىنۋعا دايىندىعى. مۇنىڭ ۇستىنە رەسەيلىك ارىپتەستەردىڭ قازاقستاننىڭ كۇردەلى، كۇلى كوپ كومىرىن جاعۋدا بىرەگەي تاجىريبەسى بار»، - دەدى ول.
اۆتور
مارلان جيەمباي
