جەڭىل كولىگىنە جىلقى تيەپ العان قاراعاندى تۇرعىنى ۇستالدى
استانا. KAZINFORM - قاراعاندى وبلىسىندا جەڭىل كولىكتىڭ سالونىنا جىلقىنى تيەپ العان جۇرگىزۋشى انىقتالدى، دەپ جازادى Polisia.kz سايتى.
قاراعاندى وبلىسى نۇرا اۋدانىندا پاترۋلدىك پوليتسيا قىزمەتكەرلەرى 11-جەلتوقساندا «نۇرا-تەمىرتاۋ» رەسپۋبليكالىق اۆتوجولىندا Audi كولىگىن توقتاتتى.
تەكسەرۋ بارىسىندا كولىكتە جىلقى بولعان.
كولىك جۇرگىزۋشىسى بۇقار جىراۋ اۋدانىنىڭ تۇرعىنى جىلقىنىڭ وزىنىكى ەكەنىن دالەلدەيتىن جانە ونى تاسىمالداۋعا قاتىستى ەشقانداي قۇجات ۇسىنا المادى.
- جۇك پەن باگاجدى تاسىمالداۋ ەرەجەلەرىن بۇزعانى ءۇشىن جۇرگىزۋشىگە اكىمشىلىك حاتتاما تولتىرىلىپ، ءىس ماتەريالدارى ۆەتەريناريالىق ينسپەكسياعا جولداندى. قازىرگى ۋاقىتتا پوليتسيا قىزمەتكەرلەرى جىلقىنىڭ ناقتى يەسىن انىقتاپ، جانۋاردىڭ ۇرلانعان-ۇرلانباعانىن تەكسەرىپ جاتىر، - دەلىنگەن حابارلامادا.
ايتا كەتەيىك، 7-قازاننان بەرى ءوتىپ جاتقان «مال ۇرلىعى» جەدەل-پروفيلاكتيكالىق ءىس-شاراسى اياسىندا نۇرا اۋدانىندا مال مەن ەت ونىمدەرىن زاڭسىز تاسىمالداۋدىڭ 37 فاكتىسى انىقتالدى. ونىڭ 20 جاعدايىندا جۇرگىزۋشىلەر اكىمشىلىك جاۋاپكەرشىلىككە تارتىلدى.
بۇعان دەيىن قاراعاندىدا ەسىرتكى ساۋدالاعاندار ۇستالعانى حابارلاندى.
