جىل باسىنان بەرى قانشا ادام جانە نە ءۇشىن رەيستەن ءتۇسىرىلدى؟
استانا. KAZINFORM - جىل باسىنان بەرى ءتۇرلى اكىمشىلىك قۇقىقبۇزۋشىلىقتار جاساعان 142 جولاۋشى اۋە رەيستەرىنەن ءتۇسىرىلدى.
ەڭ جيى كەزدەسەتىن قۇقىقبۇزۋشىلىقتار اراسىندا ىشىمدىك ءىشۋ جانە قوعامدىق ورىندارعا ماس كۇيىندە كەلۋ (83 دەرەك)، ۇشاقتا تەمەكى شەگۋ (40 دەرەك)، ۇساق بۇزاقىلىق (12 دەرەك) جانە ت. ب. بار.
سوڭعى وقيعالاردىڭ ءبىرى اقتوبە قالاسىنىڭ 24 جاستاعى تۇرعىنىنا قاتىستى بولعان.
«الماتى - اقتوبە رەيسى ۇشىپ كەلگەننەن كەيىن اقتوبە قالاسى اۋەجايىنداعى جەلىلىك پوليتسيا بولىمشەسىنىڭ قىزمەتكەرلەرى ۇشاقتىڭ دارەتحاناسىندا ەلەكترون تەمەكى شەككەن ايەلدى ۇستادى. قۇقىق بۇزۋشىعا اۋە كەمەسىنىڭ بورتىندا تەمەكى تۇتىنۋ دەرەگى بويىنشا اكىمشىلىك حاتتاما تولتىرىلىپ، 50 ا ە ك مولشەرىندە ايىپپۇل سالىندى»، - دەپ جازىلعان حابارلامادا.
كولىكتەگى پوليتسيا دەپارتامەنتى ۇشاقتا تەمەكى شەگۋ قاۋىپتى ەكەنىن ەسكەرتتى. تەمەكىنىڭ ۇشقىنى تەز تۇتاناتىن ماتەريالداردى ورتەپ جىبەرۋى مۇمكىن، ال ءتۇتىنى جولاۋشىلار مەن ەكيپاج مۇشەلەرىنىڭ دەنساۋلىعىنا زيان كەلتىرەدى.
