جىل باسىنان بەرى 700 دەن استام قازاقستاندىق ينتەرنەت الاياقتارعا الدانىپ قالعان
استانا. KAZINFORM -ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ كەزەكتى بريفينگىدە ينتەرنەت الاياقتارعا الدانىپ نەسيە الاتىن قازاقستاندىقتاردىڭ ازايماي تۇرعانىن ايتتى.
«الاياقتار ينتەرنەتتە جالعان حابارلاندىرۋ ورنالاستىرۋ ارقىلى تۇتىنۋشىلاردى الداۋىن توقتاتار ەمەس. قاسكويلەر تاۋار نەمەسە قىزمەتتىڭ اقىسىن الدىن الا تولەتىپ، سوڭىنان ءىزىن سۋىتىپ، تۇتىنۋشىنى دىمسىز قالدىرادى. جىل باسىنان بەرى وسىنداي 2700 دەن استام فاكتى تىركەلدى. الاياقتاردىڭ ايلاسىنا ءتۇسىپ قالماۋ ءۇشىن فيشينگتىك سايتتاردان ساق بولىڭىزدار. فيشينگتىك سايت دەگەنىمىز تانىمال سايتتاردىڭ اتىن جامىلعان جالعان رەسۋرستار. ولار ازاماتتاردىڭ دەربەس دەرەكتەرىن ۇرلاۋ ءۇشىن شىن سايتتاردىڭ اتىن جامىلادى. سوندىقتان براۋزەردەگى سايت مەكەنجايىن ۇدايى تەكسەرىپ وتىرۋ كەرەك. كۇدىكتى سىلتەمەلەرگە وتپەڭىزدەر. تاۋاردى العاننان كەيىن عانا تولەم جاساڭىزدار. تاۋاردىڭ بار-جوعىن تەكسەرىپ الۋ قاجەت. ەگەر ساتۋشى باسقا قالادا بولسا، سونداعى تانىستار مەن تۋىستار ارقىلى ساۋدا جاساعان ءجون»، - دەدى ول.
ءى ءى م وكىلى «تەز بايىتۋدىڭ» ينۆەستيتسيالىق سحەمالارىنا الدانۋشلار دا كوپ ەكەنىن ايتادى.
«ينۆەستيتسيا ارقىلى تەز بايۋ تۋرالى ۇسىنىستار ادامداردى قىزىقتىرىپ جاتادى. الاياقتار ازاماتتارعا «جوق ينۆەستيتسيالىق» جوبالارعا اقشا سالدىرىپ، قاراجات جىمقىرادى. جىل باسىنان بەرى 700 دەن استام قازاقستاندىق وسىنداي سحەمانىڭ قۇربانى بولدى. وزدەرىنىڭ سوڭعى اقشاسىنان ايىرىلىپ، ءتىپتى، وسى ءۇشىن نەسيە راسىمدەگەندەر دە بار»، - دەدى شىڭعىس الەكەشيەۆ.
