جىل باسىنان بەرى 3 مىڭ قازاقستاندىق ينتەرنەت الاياقتارعا 4 ميلليارد تەڭگەسىن بەرىپ جىبەرگەن
استانا. KAZINFORM - ىشكى ىستەر مينيسترلىگى كريمينالدىق پوليتسيا دەپارتامەنتى كيبەرقىلمىسقا قارسى كۇرەس ورتالىعىنىڭ باستىعى جاندوس ءسۇيىنباي ورتالىق كوممۋنيكاتسيالار قىزمەتىندە وتكەن بريفينگىدە جىل باسىنان بەرى ەڭ كوپ تىركەلگەن ينتەرنەت الاياقتىق تۇرلەرىن اتادى.
«2 ايدا 3 مىڭنان استام ينتەرنەت الاياقتىق تىركەلىپ، ازاماتتارعا 4 ميلليارد تەڭگەدەن استام شىعىن كەلدى. ءبىزدىڭ ەلدە ينتەرنەت الاياقتىقتىڭ ەڭ كوپ تاراعان ءتاسىلى بەلگىلى ساۋدا الاڭدارى مەن چاتتارىندا، الەۋمەتتىك جەلى مەن مەسسەندجەرلەردە حابارلاندىرۋ مەن جارنامالار ارقىلى جاسالاتىن ينتەرنەت ساۋدا. ادەتتە الاياقتار ءوز قىزمەتىنىڭ نەمەسە تاۋاردىڭ باعاسىن نارىقتاعىدان تومەن ەتىپ كورسەتىپ، الدىن الا تولەم سۇرايدى. بيىل 1 مىڭنان استام وسىنداي قىلمىس تىركەلدى»، - دەدى ورتالىق باستىعى.
ونىڭ سوزىنشە، الاياقتاردىڭ قۇربانى بولماۋ ءۇشىن ازاماتتارعا:
- بىرىنشىدەن، تەكسەرىلگەن جاراناما سايتتارىن پايدالانۋ كەرەك؛
- ەكىنشىدەن، تاۋاردى قولعا العاننان كەيىن عانا تولەم تۋرالى كەلىسۋ قاجەت؛
- ۇشىنشىدەن، تاۋاردىڭ بار ەكەنىنە بەينەقوڭىراۋ ارقىلى كوز جەتكىزۋ كەرەك. تاۋار باسقا قالادا بولسا سونداعى تۋىستارىڭىز بەن تانىستارىڭىز ارقىلى العىزۋ قاجەت. سونداي- اق، ول قازاقستاندىقتار كۇماندى بروكەرلىك كومپانيالارعا، جوبالارعا ينۆەستيتسيا سالۋ ارقىلى اقشانى تەز كوبەيتۋدىڭ ءتۇرلى سحەمالارىنا قاتىسۋدان شەكتەلمەي كەلە جاتقانىن ايتتى.
«جىل باسىنان بەرى 300 دەن استام قازاقستاندىق وسىنداي سحەمالارعا الدانعان ولار ءوز اقشالارىن ومىردە جوق جوبالارعا سالدى. كەيبىرى ءتىپتى نەسيە الىپ سالعان. الاياقتار ۇلتتىق كومپانيالاردىڭ بانكتەردىڭ، كريپتوبيرجالاردىڭ اتىنان جالعان سايت قۇرۋ ارقىلى ازاماتتاردى اداستىرۋدا»، - دەدى ول.
«كەلەسى كەڭ تارالعان ءادىس - بانكتەر مەن قۇقىق قورعاۋ ورگاندارىنىڭ، باسقا مەملەكەتتىك ورگان قىزمەتكەرلەرىنىڭ اتىنان شالىناتىن تەلەفون قوڭىراۋلارى»، - دەدى جاندوس ءسۇيىنباي.
اۆتور
ەسىمجان ناقتىباي
