جومارت كەنىشىندەگى اپات: وقيعا ورنىندا ۇكىمەتتىك كوميسسيا جۇمىس ىستەپ جاتىر
استانا. KAZINFORM - پرەمەر-مينيستر ولجاس بەكتەنوۆتىڭ تاپسىرماسى بويىنشا ۇلىتاۋ وبلىسىنداعى توتەنشە جاعداي ورنىندا ۆيتسە-پرەمەر قانات بوزىمبايەۆتىڭ باسشىلىعىمەن ۇكىمەتتىك كوميسسيا جۇمىس ىستەپ جاتىر، دەپ حابارلايدى ۇكىمەتتىڭ باسپا ءسوز قىزمەتى.
كوميسسيا قۇرامىندا ۇلىتاۋ وبلىسىنىڭ اكىمى داستان رىسپەكوۆ، ت ج ءمينيسترى شىڭعىس ءارىنوۆ، ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ، ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ، دەنساۋلىق ساقتاۋ ۆيتسە-ءمينيسترى ەرجان نۇرلىبايەۆ، ونەركاسىپ جانە قۇرىلىس ۆيتسە-ءمينيسترى يران شارحان، ق ر ت ج م ونەركاسىپتىك قاۋىپسىزدىك كوميتەتى ءتوراعاسىنىڭ مىندەتىن اتقارۋشى راشيد دۋبايەۆ بار.
وقيعا ورنىندا ت ج قىزمەتى، ءى ءى م جانە ونەركاسىپتىك قاۋىپسىزدىك كوميتەتىنىڭ شۇعىل تەرگەۋ توبى، سونداي-اق ەڭبەك جانە حالىقتى الەۋمەتتىك قورعاۋ مينيسترلىگى مەن ونەركاسىپ جانە قۇرىلىس مينيسترلىگىنىڭ قىزمەتكەرلەرى جۇمىس ىستەپ جاتىر.
- كوميسسيا مۇشەلەرى وقيعا ورنىندا بولىپ، تەرگەۋ بارىسىمەن تانىستى. قازا تاپقانداردىڭ وتباسىلارىنا ءبىرىنشى كەزەكتە كومەك كورسەتۋ جونىندە تاپسىرما بەرىلدى. ءارى قاراي پرەمەر- ءمينيستردىڭ ورىنباسارى شتاب وتىرىسىن وتكىزىپ، قازا تاپقانداردىڭ تۋىستارىمەن كەزدەسەدى، - دەلىنگەن حابارلامادا.
وسىعان دەيىن ۇلىتاۋ وبلىسىنداعى شاحتادا اپات بولىپ، 7 ادام توتەنشە جاعدايدا قالعانى تۋرالى جازدىق. رەسمي دەرەككە قاراعاندا، شاحتادا تاۋ ماسساسى قۇلاعان.
«قازاق مىس» كورپوراتسياسىنىڭ حابارلاۋىنشا، الدىن الا مالىمەتكە سايكەس كورپوراتسيا كەنىشتەرىنە ءتان ەمەس تابيعي گازدىڭ جارىلىسى بولعان.
«جومارت» كەنىشىندە كوز جۇمعان جەتى جۇمىسشىنىڭ دا دەنەسى تابىلدى. توتەنشە جاعدايلار مينيسترلىگى باسپا ءسوز قىزمەتىنىڭ حابارلاۋىنشا، جۇمىسشىلاردىڭ دەنەسى جوعارىعا كوتەرىلىپ، سوت- مەديتسينالىق ساراپتاما جۇرگىزۋ ءۇشىن پوليتسيا قىزمەتكەرلەرىنە تاپسىرىلدى.
پرەزيدەنت قاسىم-جومارت توقايەۆ «قازاق مىس» كورپوراتسياسىنىڭ ۇلىتاۋ وبلىسىنداعى كەنىشىندە تاۋ ماسساسىنىڭ قۇلاۋى سالدارىنان قازا بولعان جۇمىسشىلاردىڭ تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى.
جومارت كەنىشىندەگى قايعىلى وقيعا كەزىندە قازا تاپقانداردىڭ اتى-جوندەرى جاريالاندى.
اۆتور
اينۇر تۋماكبايەۆا
