جول ەرەجەسىن جيى بۇزاتىندارعا ايىپپۇل تولەۋدە %50 جەڭىلدىكتى الىپ تاستاۋ كەرەك - سەناتور
استانا. KAZINFORM - ايىپپۇل جول ءجۇرىسى قاعيدالارىنىڭ جيى بۇزىلماۋىنا كەپىلدىك بەرە المايدى. سەناتور مارات قوجايەۆ ءوزىنىڭ دەپۋتاتتىق ساۋالىندا ايىپپۇل ارقىلى ەرەجەنى قايتا بۇزۋمەن كۇرەس مۇمكىن ەمەستىگىن ايتا كەلىپ، سوڭعى كەزدە جول ەرەجەسىن بۇزۋ دەرەكتەرى كوبەيە تۇسكەنىن اتاپ ءوتتى.
- تەحنيكالىق قۇرالدار («سەرگەك» جۇيەسى) جول ءجۇرىسى قاعيدالارىن بۇزۋدىڭ نەگىزگى بولىگىن اۆتوماتتى تۇردە تىركەيدى. ەرەجەنى جۇيەلى تۇردە بۇزۋدىڭ الدىن الۋعا قولدانىستاعى قۇقىق قولدانۋ تاجىريبەسى مۇمكىندىك بەرمەيدى. ويتكەنى تەحنيكالىق قۇرالدار ارقىلى اۆتوماتتى تۇردە تىركەگەن جۇرگىزۋشىنى ەرەجەنى قايتا بۇزعانى ءۇشىن جاۋاپقا تارتۋ مۇمكىن ەمەس. سەبەبى، كولىك قۇرالىنىڭ يەسىنە ەرەجە بۇزۋدىڭ تاريحى ەسكەرىلمەي ايىپپۇل جازىلادى. سونداي- اق، جول قوزعالىسى ەرەجەسىن جۇيەلى تۇردە ەلەمەيتىن، جول ءتارتىبىن قاساقانا بۇزۋشىلارعا جول ءجۇرىسى قاعيدالارى بويىنشا ەمتيحاندى قايتا تاپسىرۋدى مىندەتتەۋ مۇمكىن ەمەس. سونىمەن قاتار، تەحنيكالىق قۇرالدار ەرەجەنى بۇزۋ دەرەگىن عانا تىركەيدى، ءبىراق جۇرگىزۋشىنىڭ دايىندىق دەڭگەيىن جانە ونىڭ جول ەرەجەسىن ورەسكەل بۇزۋ مەن قاۋىپتى ارەكەتكە بەيىمدىلىگىن باعالاۋعا مۇمكىندىك بەرمەيدى، - دەدى مارات قوجايەۆ ۇكىمەت باسشىسىنىڭ اتىنا جولداعان ساۋالىندا.
سەناتور كەيبىر قالتالى جۇرگىزۋشىلەر ايىپپۇلدى جاۋاپكەرشىلىكتەن قاشۋدىڭ تەتىگى رەتىندە قارايتىنىن اتاپ ءوتتى. ماسەلەن، الماتىدا كولىك قۇرالىنىڭ ءبىر جۇرگىزۋشىسى ءبىر جىلدا 3 ميلليون تەڭگەدەن استام سومادا ايىپپۇل تولەپ، 143 رەت ەرەجە بۇزعانى انىقتالعان.
دەپۋتات الدىن الۋ جۇمىسىن كۇشەيتۋ ءۇشىن مۇنداي جۇرگىزۋشىلەردى سىناقتى قايتا تاپسىرۋعا جىبەرۋدى، سونداي- اق قاجەت بولعان جاعدايدا ولاردى جۇرگىزۋشى كۋالىگىنەن ايىرۋدى ۇسىندى.
- اسىرەسە، تەحنيكالىق قۇرالدار تىركەگەن ەرەجە بۇزۋ دەرەگى بويىنشا جۇرگىزۋشىلەردىڭ جاۋاپكەرشىلىگىن كۇشەيتۋ ماسەلەسىن قاراۋدى ۇسىنامىز. ا ق ب ت ك- دەگى وزگەرىستەردە تەحنيكالىق قۇرالدار تىركەگەن 10 جانە ودان دا كوپ ەرەجە بۇزۋ دەرەگى بار جۇرگىزۋشىلەردى جول ءجۇرىسى قاعيدالارى بويىنشا تەوريالىق ەمتيحاندى قايتا تاپسىرۋعا جىبەرۋدى مىندەتتى ەتۋ ماڭىزدى. كامەرالار تىركەگەن جول قوزعالىسى ەرەجەسىن قايتالاپ بۇزعانى ءۇشىن جاۋاپكەرشىلىكتى كۇشەيتۋ قاجەت، ياعني جۇرگىزۋشى كۋالىگىنەن ۋاقىتشا ايىرۋعا دەيىن جازالانۋى كەرەك. زاڭ تالابىن بۇزاتىندارعا بەلگىلى ءبىر كەزەڭدەگى ءتارتىپ بۇزۋ سانىن ەسكەرەتىن سارالانعان جازا تەتىگىن ازىرلەۋ جانە ەرەجەنى جۇيەلى تۇردە بۇزاتىندارعا ايىپپۇل تولەۋدە %50 جەڭىلدىكتى الىپ تاستاۋ ماڭىزدى، - دەدى دەپۋتات.
