جول اپاتىنان قازا تاپقان بالالار سانى ارتىپ بارادى
10 ايدا ەلىمىزدە جول اپاتىنان قازا تاپقان بالالاردىڭ سانى 14 پايىزعا ارتتى. بۇل تۋرالى ىشكى ىستەر مينيسترلىگى اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا ايتتى، دەپ حابارلايدى Kazinform.
«وكىنىشكە قاراي، حالىقپەن جىل سايىنعى اعارتۋ جۇمىستارىن جۇرگىزۋگە قاراماستان بالالاردىڭ قاۋىپسىزدىگىنە قاتەر توندىرەتىن ءبىر پروبلەماعا - جول-كولىك وقيعالارىنا تاپ بولامىز. وسى جىلدىڭ 10 ايىندا جول-كولىك وقيعاسى كەزىندە قازا تاپقان بالالاردىڭ سانى 14، ال زارداپ شەككەن بالالاردىڭ سانى 3 پايىزعا ارتىپ وتىر. زارداپ شەككەن بالالاردىڭ جارتىسىنان كوبى جولاۋشىلار، ال قالعانى جاياۋ جۇرگىنشىلەر. كوپ جاعدايدا بالالار ەرەسەكتەردىڭ تاسىمالداۋ ەرەجەلەرىن بۇزعانى ءۇشىن زارداپ شەگەدى. سەبەبى ولار اۆتوورىندىقتار، بۋستەرلەر جانە اداپتەرلەر سياقتى بالالاردى ۇستايتىن قۇرىلعىلاردى پايدالانبايدى. بالالارعا قاۋىپسىزدىك دەڭگەيىن باعالاۋدى ۇيرەنۋگە جانە قيىن جاعدايلاردا وزدەرىن سەنىمدى سەزىنۋگە كومەكتەسۋىمىز كەرەك»، - دەدى اقتوتى بورانوۆا مينيسترلىكتىڭ باسپا ءسوز قىزمەتى الاڭىندا وتكەن بريفينگتە.
ونىڭ اتاپ وتۋىنشە، بالانىڭ جولداعى مىنەز-قۇلقى كوبىنەسە اتا-اناسىنىڭ مىنەز-قۇلقىنا بايلانىستى. سوندىقتان ەگەر اتا-انالار جول قاۋىپسىزدىگى ەرەجەلەرى تۋرالى سويلەسىپ قانا قويماي، ولاردى وزدەرى ساقتاسا، بۇل مىنەز-قۇلىق بالا ءۇشىن نورماعا اينالادى.
«جاياۋ جۇرگىنشىلەر كىنالى بولاتىن جول-كولىك وقيعالارىنىڭ نەگىزگى سەبەبى - بەلگىلەنبەگەن جەردەن جولدى كەسىپ ءوتۋى، جاقىنداپ قالعان كولىكتىڭ الدىنان جۇگىرىپ ءوتۋ جانە باعدارشامنىڭ تىيىم سالۋ سيگنالىنا ءوتۋ»، - دەدى ول.
