جوعارى لاۋازىمدى تۇلعالار قانداي مۇلكى تۋرالى اقپاراتتى جاريالاۋعا مىندەتتى
استانا. KAZINFORM - سالىق كودەكسىنىڭ 635-بابى بويىنشا ەلدەگى جوعارى لاۋازىمدى تۇلعالار 2024 -جىلعى كىرىستەر مەن مۇلىك تۋرالى دەكلاراتسياسىن 2025 -جىلدىڭ 15-قىركۇيەگىنە دەيىن ۇسىنىلۋى كەرەك.
سىبايلاس جەمقورلىققا قارسى ءىس- قيمىل اگەنتتىگى Kazinform ساۋالىنا جولداعان جاۋاپتا مۇلكىن كوپشىلىككە جاريالاۋعا مىندەتتى جوعارى لاۋازىم يەلەرىن، ولاردىڭ مۇلكى تۋرالى قانداي مالىمەتتەردى جاريالاۋعا مىندەتتى ەكەنىن ايتتى.
- 2024 -جىلعى تابىستارى مەن مۇلكى تۋرالى دەكلاراتسيالاردان الىنعان مالىمەتتەر 2025 -جىلدىڭ سوڭىنا دەيىن جاريالانۋى ءتيىس. قازاقستان رەسپۋبليكاسى پرەزيدەنتىنىڭ 2015 -جىلعى 29 جەلتوقسانداعى №150 جارلىعىمەن مەملەكەتتىك ساياسي جانە اكىمشىلىك قىزمەتشىلەر لاۋازىمدارىنىڭ ءتىزىلىمى بەكىتىلدى، - دەلىنگەن جاۋاپتا.
اگەنتتىك ناقتىلاعان تىزىلىمگە سايكەس پرەمەر- مينيستر جانە ونىڭ ورىنباسارلارى، پرەزيدەنت اكىمشىلىگىنىڭ باسشىسى، پرەزيدەنتكە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى (جوعارعى سوت ءتوراعاسى، ۇلتتىق بانك ءتوراعاسى، باس پروكۋرور) ساياسي مەملەكەتتىك قىزمەتشىلەر سانالادى.
پارلامەنت ءماجىلىسى مەن سەناتىنىڭ ءتوراعالارى پارلامەنت دەپۋتاتتارى سانالادى («قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭنىڭ 9-بابىنىڭ 1-تارماعى).
جوعارعى سوتتىڭ ءتوراعاسى - سۋديا («قازاقستان رەسپۋبليكاسىنىڭ سوت جۇيەسى جانە سۋديالارىنىڭ مارتەبەسى تۋرالى» كونستيتۋتسيالىق زاڭنىڭ 20-بابىنىڭ 1-تارماعى).
«سامۇرىق- قازىنا» ۇلتتىق ءال- اۋقات قورى» ا ق - كۆازيمەملەكەتتىك سەكتوردىڭ سۋبەكتىسى.
- وسىلايشا، اتالعان ساياسي مەملەكەتتىك قىزمەتشىلەردىڭ، پارلامەنت پالاتالارى ءتوراعالارىنىڭ، جوعارعى سوت ءتوراعاسىنىڭ، «سامۇرىق- قازىنا» قورى باسقارما ءتوراعاسىنىڭ دەكلاراتسيالارىنان مالىمەتتەر جاريالانۋعا ءتيىس، - دەيدى ۆەدوستۆودان.
اگەنتتىك «جاريالاۋعا جاتاتىن مالىمەتتەر تىزبەسىن بەكىتۋ تۋرالى» بۇيرىقتىڭ جوباسىن ازىرلەپ، مەملەكەتتىك ورگانداردىڭ، «اتامەكەن» ۇلتتىق كاسىپكەرلەر پالاتاسىنىڭ ماقۇلداۋىن العان.
سونىمەن، جاريالاۋعا جاتاتىن مالىمەتتەر مىنالار:
جەكە تۇلعانىڭ ءوز بەتىنشە سالىق سالۋعا جاتاتىن تابىستارى تۋرالى اقپارات؛
ەسەپتى سالىق كەزەڭى ىشىندە، ونىڭ ىشىندە قازاقستان رەسپۋبليكاسىنان تىس جەرلەردە وتەۋسىز الىنعان مۇلىكتى (ونىڭ ىشىندە اقشانى) ساتىپ الۋ جانە (نەمەسە) الۋ تۋرالى اقپارات؛
ەسەپتى سالىق كەزەڭى ىشىندە، ونىڭ ىشىندە قازاقستان رەسپۋبليكاسىنان تىس جەرلەردە يەلىكتەن شىعارۋ جانە (نەمەسە) وتەۋسىز بەرىلگەن مۇلىك تۋرالى اقپارات؛
قازاقستان رەسپۋبليكاسىنان تىس ورنالاسقان شەتەلدىك بانكتەردەگى بانكتىك شوتتارداعى اقشا تۋرالى اقپارات؛
ەسەپتى سالىق كەزەڭىنىڭ 31 جەلتوقسانىنداعى جاعداي بويىنشا جەكە تۇلعانىڭ مەنشىك قۇقىعىنداعى مۇلىك تۋرالى اقپارات؛
شەت مەملەكەتتىڭ زاڭناماسىنا سايكەس شەت مەملەكەتتىڭ قۇزىرەتتى ورگانىندا تىركەلۋگە (ەسەپكە الۋعا) جاتاتىن مۇلىككە؛
ەميتەنتتەرى قازاقستان رەسپۋبليكاسىنان تىس جەرلەردە تىركەلگەن باعالى قاعازدارعا، تسيفرلىق اكتيۆتەرگە؛
ينۆەستيتسيالىق التىن؛
قازاقستان رەسپۋبليكاسىنان تىس جەردە تىركەلگەن زاڭدى تۇلعانىڭ جارعىلىق كاپيتالىنداعى قاتىسۋ ۇلەسى.
- بۇل رەتتە، ادامنىڭ جسن- ءىن، ونىڭ تۇرعىلىقتى جەرىن، جىلجىمايتىن مۇلىك وبەكتىلەرىنىڭ ورنالاسقان مەكەنجايىن جاريالاۋ كوزدەلمەگەن، ويتكەنى بۇل دەرەكتەر دەربەس دەرەكتەرگە جاتادى.
«سىبايلاس جەمقورلىققا قارسى ءىس- قيمىل تۋرالى» زاڭنىڭ 11-بابىنىڭ 9-تارماعىنا سايكەس اتالعان ادامداردىڭ تابىستارى مەن مۇلكى تۋرالى دەكلاراتسيالاردان الىنعان مالىمەتتەردى مەملەكەتتىك ورگانداردىڭ، ۇيىمداردىڭ، قازاقستان رەسپۋبليكاسى پارلامەنتىنىڭ جانە قازاقستان رەسپۋبليكاسى جوعارعى سوتىنىڭ پەرسونالدى باسقارۋ قىزمەتتەرى وزدەرىنىڭ رەسمي ينتەرنەت- رەسۋرستارىندا ورنالاستىرادى، - دەپ جازىلعان رەسمي جاۋاپتا.
ەسكە سالساق، قارجى ءمينيسترى ءمادي تاكيەۆ ۇكىمەتتىڭ كەڭەيتىلگەن وتىرىسىنان كەيىن وتكەن باسپا ءسوز ءماسليحاتىندا تابىس دەكلاراتسياسىن جاريالاۋعا مىندەتتى لاۋازىم يەلەرى قاشان دەرەكتەرىن كوپشىلىك نازارىنا شىعاراتىنى تۋرالى پىكىر بىلدىرگەن ەدى.
اۆتور
ەسىمجان ناقتىباي
