جوعارعى سوت ءومىر بويىنا باس بوستاندىعىنان ايىرىلعان ادامنىڭ ءوتىنىشىن قاناعاتتاندىرمادى
استانا. KAZINFORM - جوعارعى سوتتا ا. ا. مەرعاليەۆتىڭ توراعالىعىمەن ءومىر بويىنا باس بوستاندىعىنان ايىرۋعا سوتتالعان ا. ج. توعايەۆقا قاتىستى قىلمىستىق ءىس كاسساتسيالىق تارتىپتە قارالدى.
ق ر جوعارعى سوتى باسپا ءسوز قىزمەتىنىڭ حابارلاۋىنشا، وتىرىس سوتتالعان ا. توعايەۆتىڭ، ونىڭ قورعاۋشىسى- ادۆوكاتتىڭ قاتىسۋىمەن، سونداي-اق ونلاين رەجيمىندە قاتىسقان جابىرلەنۋشىنىڭ وكىلىنىڭ قاتىسۋىمەن ءوتتى.
مەملەكەتتىك ايىپتاۋدى باس پروكۋروردىڭ ورىنباسارى ءا. ق. شىڭداليەۆ قولدادى.
بيىلعى اقپان ايىندا توعايەۆ وزىنە قاتىستى سوت اكتىلەرىن قايتا قاراۋ، ءوزىنىڭ ءىس-ارەكەتتەرىن سارالاۋدىڭ دۇرىستىعىنا، سونداي-اق جازالاۋ شاراسىنا داۋ ايتىپ ءوتىنىشحات بەرگەن.
قاراۋ ناتيجەسىندە جوعارعى سوتتىڭ سوت القاسى سوت اكتىلەرىن وزگەرىسسىز قالدىرۋ تۋرالى شەشىم شىعاردى، سوتتالعاننىڭ ءوتىنىشحاتى قاناعاتتاندىرىلعان جوق.
ءىس ماتەريالدارىنان انىقتالعانداي، 2014 -جىلعى 25-ماۋسىمداعى سوت ۇكىمىمەن توعايەۆ توناۋ جانە بانديتيزممەن بايلانىستى كىسى ءولتىرۋ، شابۋىل جاسالعان ادامنىڭ ومىرىنە نەمەسە دەنساۋلىعىنا اۋىر زيان كەلتىرەتىن قاۋىپتى زورلىق-زومبىلىقپەن بايلانىستى توناۋ، سونداي-اق تۇراقتى قارۋلى توپ (باندى) قۇرۋ كەزىندە، ۇيىمداسقان توپپەن، قارۋدى قولدانۋى، ۇيىمداسقان توپتىڭ تۇرعىن ءۇي-جايلارعا زاڭسىز كىرۋ ارقىلى اسا ءىرى كولەمدە قىلمىس جاساعانى ءۇشىن كىنالى دەپ تانىلدى.
توعايەۆ كاسىپكەرلىكپەن اينالىساتىن ازاماتتارعا قارۋلى شابۋىل جاساۋ ماقساتىندا قىلمىستىق توپ قۇرىپ، سىبايلاستارىمەن بىرگە ەرلى- زايىپتىلاردىڭ ۇيىنە باسىپ كىرگەنى انىقتالدى.
سوسىن سوتتالۋشىلار جابىرلەنۋشىنى ءولتىرىپ، ودان كەيىن ونىڭ ايەلىن بايلاپ، اۋىر دەنە جاراقاتىن كەلتىرىپ، ولاردان وزدەرىندە بار اقشا مەن باعالى زاتتاردى بەرۋدى تالاپ ەتكەن.
تالاپ ەتكەندەرىن العاننان كەيىن ولار قىلمىس ورنىنان بوي تاسالاعان.
توعايەۆتىڭ كىناسى سوتتالعانداردىڭ مويىنداۋلارىمەن، جابىرلەنۋشىنىڭ، كۋالاردىڭ ايعاقتارىمەن، سوت-مەديتسينالىق-بيولوگيالىق ساراپتامالاردىڭ قورىتىندىلارىمەن، وقيعا بولعان جەردى قاراۋ ناتيجەلەرىمەن، تاركىلەۋمەن ءىشىنارا دالەلدەندى.
«ءومىر بويىنا باس بوستاندىعىنان ايىرۋ تۇرىندەگى تاعايىندالعان جازا جاسالعان ءىس-ارەكەتتەردىڭ قوعامعا قاۋىپتىلىگىن، ارەكەتىندە قىلمىستىڭ ءقاۋىپتى قايتالانۋىن قۇرايتىن بۇرىن سوتتالعان توعايەۆتىڭ جەكە باسىن جانە سوڭعىسىنىڭ اسا بەلسەندى قىلمىستى ءرولىن ەسكەرە وتىرىپ، زاڭدى، نەگىزدى جانە ءادىل بولىپ تابىلادى»، - دەلىنگەن حابارلامادا.
