جەتىسۋدا شارۋالار قانت قىزىلشاسى ءۇشىن قانشا سۋبسيديا الدى

وڭىردەگى اقسۋ جانە كوكسۋ قانت زاۋىتتارىنا وتكىزىلگەن 560 مىڭ توننا قانت قىزىلشاسىنا مەملەكەتتەن 14 ميلليارد تەڭگە سۋبسيديا تولىق كولەمدە تولەندى. وبلىستىق اۋىل شارۋاشىلىعى باسقارماسىنىڭ مالىمەتىنشە قانت قىزىلشاسى بويىنشا سۋبسيديالاۋعا 679 ءوتىنىم تۇسكەن. سونداي-اق اقسۋ جانە كوكسۋ قانت زاۋىتتارى قابىلداعان قانت قىزىلشاسى ءۇشىن شارۋا قوجالىقتارىنا 8,4 ميلليارد تەڭگە تولەدى.

- بۇگىنگى كۇنى ەكى زاۋىت تا شارۋاشىلىقتارىمىزبەن تيەسىلى ەسەپ ايىرىسىپ بولدى. قازىرگى كەزدە باسىم داقىلدارعا بەرىلەتىن سۋبسيديانى الدىق، سونىڭ ارقاسىندا كوكتەمگى دالا جۇمىستارىنا دايىندىعىمىز قىزۋ ءجۇرىپ جاتىر. جالپى كوكتەمگى ەگىسكە قاجەتتى تەحنيكالاردى جوندەۋ جۇمىستارىن وسىدان ءبىر اي بۇرىن باستاعانبىز. قازىر ەگىستىك القاپتارعا كەرەكتى تۇقىمعا تاپسىرىس بەرىپ قويدىق. ءبىز جىل سايىن قانت قىزىلشاسىن كەم دەگەندە 100 گەكتار جەرگە سەبەمىز. بيىل دا قانت قىزىلشاسىن، جۇگەرى، مايبۇرشاق سياقتى ءبىرقاتار داقىل ەگۋدى جوسپارلاپ وتىرمىز. كوكتەمگى دالا جۇمىستارىنا جەڭىلدەتىلگەن باعامەن بەرىلەتىن جانار-جاعارماي الاتىن قارجىمىز دا دايىن، - دەيدى كوكسۋ اۋدانىنداعى «كەڭ دالا» شارۋا قوجالىعىنىڭ باسشىسى قاليبەك الپىسبايەۆ.

ايتا كەتەيىك جەتىسۋ وبلىسىندا قانت قىزىلشاسىنىڭ ەگىس القاپتارى 13,7 مىڭ گەكتار بولدى. ودان جالپى 635 مىڭ توننا ءونىم الىندى، ورتاشا ونىمدىلىگى گەكتارىنا 465 تسەنتنەردەن اينالدى. الىنعان ءونىمنىڭ 5 مىڭ تونناسى مال ازىعىنا باعىتتالسا، 630 مىڭ تونناسى زاۋىتتارعا وتكىزىلدى، ونىڭ 560 مىڭ تونناسى تازا سالماق.

ەسكە سالايىق وسىعان دەيىن كوكسۋ قانت زاۋىتىنا كەزەكتىڭ 1 شاقىرىمنان اسىپ كەتكەنىن جانە جەتىسۋلىق شارۋالاردىڭ ايازدا قانت قىزىلشاسىنا كەزەكتە تۇرۋعا ءماجبۇر بولعانىن جازعانبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى