جەتىسۋ وبلىسىنىڭ الەۋمەتتىك-ەكونوميكالىق دامۋى: ساندار سويلەسىن

ول 2022-جىلدىڭ ماۋسىم ايىندا قازاقستان رەسپۋبليكاسى پرەزيدەنتىنىڭ جارلىعىمەن قۇرىلىپ، سودان بەرى ەكونوميكالىق جانە الەۋمەتتىك الەۋەتىن بەلسەندى تۇردە ارتتىرىپ كەلەدى.

ءوڭىر كوپتەگەن اگروونەركاسىپتىك كاسىپورىندارىمەن تانىمال، مۇندا مال شارۋاشىلىعى دا، ەگىن شارۋاشىلىعى دا تابىستى دامىپ كەلەدى. سونداي-اق، جەتىسۋ ماڭىزدى تۋريستىك ورتالىققا اينالدى. وبلىسقا اقسۋ، الاكول، ەسكەلدى، قاراتال، كەربۇلاق، كوكسۋ، پانفيلوۆ، سارقان اۋداندارى، سونداي-اق تالدىقورعان، تەكەلى قالالارى كىرەدى. 2024-جىلعى 1-قازانداعى جاعداي بويىنشا وبلىس حالقىنىڭ سانى 696,1 مىڭ ادام، ونىڭ 384,3 مىڭى اۋىلدىق جەرلەردە تۇرادى.

ەكونوميكا

وبلىس اكىمدىگىنىڭ مالىمەتىنشە، 10 ايدىڭ قورىتىندىسى بويىنشا قىسقا مەرزىمدى ەكونوميكالىق كورسەتكىش 112,8 پايىز. اۋىل شارۋاشىلىعى سالاسىندا ءوندىرىس كولەمى 4,9 پايىزعا نەمەسە 362,4 ميلليارد تەڭگەگە وسكەن، ونەركاسىپ - 3,9 پايىزعا نەمەسە 278,8 ميلليارد تەڭگەگە ارتتى، ساۋدا - 1,4 ەسەگە نەمەسە 711,6 ميلليارد تەڭگەگە ءوستى. سونداي-اق، قۇرىلىس سالالارىندا 1,3 ەسەگە نەمەسە 231,1 ميلليارد تەڭگەگە ءوسىم بار.

جەتىسۋدا 10 ايدا 30,8 پايىزعا وسىممەن 327,1 ميلليارد تەڭگە ينۆەستيتسيا تارتىلدى. جىل سوڭىنا دەيىن جالپى وڭىرلىك ءونىمنىڭ ءوسىمى 3,6 پايىز دەڭگەيىندە جوسپارلانىپ وتىر. ونەركاسىپ كولەمى 2,8 پايىزعا ارتىپ، 335,6 ميلليارد تەڭگە بولدى دەپ كۇتىلۋدە.

اگروونەركاسىپ كەشەنى

وسى جىلى اگروونەركاسىپ كەشەنىن قولداۋعا 40 ميلليارد تەڭگە ءبولىندى، ونىڭ ىشىندە سۋبسيديا 23,3 ميلليارد تەڭگە. 10-ايدا اۋىل شارۋاشىلىعىنىڭ جالپى ءونىمىنىڭ كولەمى 4,9 پايىزعا ءوسىپ، 362,4 ميلليارد تەڭگە بولدى. جىل سوڭىنا دەيىن ول 514,4 ميلليارد تەڭگەگە جەتەدى دەگەن بولجام بار.

2024-جىلى اۋىل شارۋاشىلىعى داقىلدارىنىڭ ەگىستەرى 44,3 مىڭ گەكتارعا كەڭەيتىلىپ، 510,1 مىڭ گەكتاردى قۇرادى. وبلىستا كۇزگى جيىن-تەرىن اياقتالدى: 9-جەلتوقسانعا 872,1 مىڭ توننا ءداندى داقىلدار، 195 مىڭ توننا مايلى داقىلدار باستىرىلدى، 266 مىڭ توننا كوكونىس-باقشا داقىلدارى، 132,1 مىڭ توننا كارتوپ جينالدى.

مال شارۋاشىلىعى قارقىندى دامىپ كەلەدى: قاڭتار- قازاندا مالدىڭ نەگىزگى تۇرلەرىنىڭ سانى ءوستى: تۇيە - 2,3 مىڭ باس (123,5 پايىز)، ءىرى قارا - 518,8 مىڭ باس (123,4 پايىز)، ۇساق مال - 1,9 ميلليون باس (111,2 پايىز) جانە جىلقى - 197,7 مىڭ باس (102,7 پايىز). ەت ءوندىرۋ 5 پايىزعا، ءسۇت 2,4 پايىزعا ۇلعايدى. وبلىستا 71 مال بورداقىلاۋ الاڭى مەن 36 تاۋارلى-ءسۇت فەرماسى جۇمىس ىستەيدى.

ونەركاسىپ

وبلىستىڭ ونەركاسىپتىك وندىرىسىندە 549 ونەركاسىپتىك كاسىپورىن جۇمىس ىستەيدى، ونىڭ 14 ءى - ءىرى، 13 ءى - ورتا، وندا 30 مىڭنان استام ادام جۇمىسپەن قامتىلعان.

ءوندىرىس كولەمى 3,7 پايىزعا ءوستى. (213,0 ميلليارد تەڭگە) تاۋ-كەن ءوندىرۋ ونەركاسىبىندە - 22,6 پايىزعا (7 ميلليارد تەڭگە)، سۋمەن قامتاماسىز ەتۋ، قالدىقتاردى جيناۋ، وڭدەۋ كادەگە جاراتۋ، لاستانۋدى جويۋ جونىندەگى ءىس-شارالار - 9, 3 پايىز. (3,6 ميلليارد تەڭگە). جىل سوڭىنا دەيىن ونەركاسىپ ءونىمىنىڭ كولەمى 2,8 پايىزعا ارتىپ 335,6 ميلليارد تەڭگەگە جەتەدى دەپ كۇتىلۋدە.

باسقا ەكونوميكالىق كورسەتكىشتەر

وڭىردە 247,6 مىڭ شارشى مەتر تۇرعىن ءۇي پايدالانۋعا بەرىلدى. بۇل 2023-جىلعى دەڭگەيدەن 4,1 پايىزعا جوعارى. جىل سوڭىنا دەيىن بۇل كورسەتكىش 349,3 مىڭ شارشى مەترگە جەتەدى.

وبلىستا 2024 -جىلدىڭ 10 ايىندا جۇمىس ىستەپ تۇرعان شوب سۋبەكتىلەرىنىڭ سانى 60,7 مىڭ بىرلىكتى قۇرادى، جۇمىسپەن قامتىلعاندار سانى - 104,7 مىڭ ادام. ولار وندىرگەن ونىمدەر مەن كورسەتىلگەن قىزمەتتەردىڭ كولەمى - 491,5 ميلليارد تەڭگە. بيۋجەتكە تۇسەتىن سالىق تۇسىمدەرى 2023-جىلعى دەڭگەيمەن سالىستىرعاندا 1,3 ەسەگە ءوسىپ، 42,1 ميلليارد تەڭگەگە جەتتى.

2024-جىلى جولداردى سالۋعا جانە جوندەۋگە 40,6 ميلليارد تەڭگە ءبولىندى، 1-قازانعا 19,2 ميلليارد تەڭگە يگەرىلدى. ناتيجەسىندە جاقسى جانە قاناعاتتانارلىق جاعدايداعى جولداردىڭ دەڭگەيى 94 پايىزعا جەتەدى.

جۇمىسپەن قامتاماسىز ەتۋ، حالىقتىڭ تابىسىن ارتتىرۋ ماقساتىندا 2024-جىلدىڭ 10 ايىندا 23,5 مىڭنان استام جۇمىسسىز جانە ءوزىن-ءوزى جۇمىسپەن قامتىعان ازاماتتار بەلسەندى شارالارمەن قامتىلدى. ونىڭ ىشىندە 9,7 مىڭ ادام تۇراقتى جۇمىسقا ورنالاستىرىلدى.

وڭىرلىك جۇمىسپەن قامتۋ كارتاسى شەڭبەرىندە وبلىس بويىنشا 28409 جۇمىس ورنى قۇرىلدى، ونىڭ ىشىندە 16195 ءى تۇراقتى جۇمىس ورنى.

تۋريزم

جالپى، وڭىردە تۋريزم سالاسىن دامىتۋ 5 دەستيناتسيانىڭ الەۋەتىنە نەگىزدەلگەن. بۇل الاكول جانە بالقاش كولدەرى، «التىنەمەل» جانە «جوڭعار-الاتاۋى» ۇلتتىق پاركتەرى، سونداي-اق جوڭعار الاتاۋىنىڭ تاۋلى القابى.

2024-جىلى تۋريزم نىساندارىن كورۋگە 2 ميلليوننان استام ادام كەلدى.

اقىلى تۋريستىك- ساۋىقتىرۋ قىزمەتتەرىنىڭ كولەمى 10,7 ميلليارد تەڭگەگە جەتتى. بۇل رەتتە نەگىزگى كاپيتالعا ينۆەستيتسيا كولەمى - 19,7 ميلليارد تەڭگە.

سوڭعى جىلداردا الاكولدە ينفراقۇرىلىم قارقىندى دامىتىلۋدا.

ق ر پرەزيدەنتىنىڭ تاپسىرماسىن ورىنداۋ ءۇشىن ءۇشارال قالاسى اۋەجايىنىڭ وتكىزۋ قابىلەتى ساعاتىنا 75 جولاۋشىعا دەيىنگى قوسىمشا تەرمينالىن سالۋعا جوبالىق-سمەتالىق قۇجاتتاما ازىرلەنۋدە.

ەكولوگيالىق ءتۋريزمدى دامىتۋ ماقساتىندا شاڭعى-بياتلون كەشەنىن سالۋ بويىنشا جوبالىق قۇجاتتاما ازىرلەنىپ جاتىر (128,8 ميلليون تەڭگە).

وبلىس بيۋجەتى 563,2 ميلليارد تەڭگە. شىعىنداردىڭ جالپى سوماسىندا ەڭ كوپ ۇلەسى الەۋمەتتىك- مادەني سالانىڭ شىعىستارىنا تيەسىلى - 285,4 ميلليارد تەڭگە نەمەسە 51 پايىز (ءبىلىم بەرۋ - 204,2 ميلليارد تەڭگە، الەۋمەتتىك كومەك جانە الەۋمەتتىك قامسىزداندىرۋ - 33,7 ميلليارد تەڭگە، مادەنيەت، سپورت جانە اقپاراتتىق كەڭىستىك - 30,9 ميلليارد تەڭگە، دەنساۋلىق ساقتاۋ - 16,6 ميلليارد تەڭگە)، تۇرعىن ءۇي-كوممۋنالدىق شارۋاشىلىق - 11,2 پايىز، اۋىل شارۋاشىلىعى 9,2 پايىز، كولىك جانە كوممۋنيكاتسيا سالاسىندا 8,2 پايىز.

ەسكە سالساق، بۇگىن قاسىم-جومارت توقايەۆ جەتىسۋ وبلىسىنا باردى.

ساپارى بارىسىندا پرەزيدەنت مەملەكەت باسشىسى «تالدىقورعان» يندۋستريالىق ايماعىن ارالادى.

سونداي-اق، قاسىم-جومارت توقايەۆقا جەتىسۋ وبلىسىنىڭ اكىمى بەيبىت يسابايەۆ ءوڭىردىڭ الەۋمەتتىك-ەكونوميكالىق دامۋى تۋرالى باياندادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى