جەتىسۋ وبلىسىندا ەرەكشە قاجەتتىلىگى بار بالالارعا ارنالعان تۇڭعىش يپپوتەراپيا ورتالىعى اشىلدى

ورتالىقتىڭ اشىلۋىنا وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى قولداۋ كورسەتكەن.

- ەرەكشە قاجەتتىلىكتەرى بار بالانىڭ دۇنيەگە كەلۋى - اتا-انا ءۇشىن ۇلكەن جاۋاپكەرشىلىك. ونداي بالالاردىڭ قوعامنىڭ تولىققاندى مۇشەسى بولىپ وسۋىنە مەملەكەت بارلىق مۇمكىندىكتى جاساپ كەلەدى. وڭالتۋ ورتالىقتارىنىڭ، تۇزەتۋ كابينەتتەرىنىڭ قىزمەتى ارقاسىندا بالالار دەنساۋلىعىن جاقسارتۋعا، پايدالى داعدىلاردى يگەرۋگە، قوعامعا بەيىمدەلۋگە ناقتى مۇمكىندىك الىپ وتىر. وسى رەتتە جاركەنتتە اشىلعان بۇگىنگى يپپوتەراپيا ورتالىعىنىڭ دا ۇلەسى زور بولادى دەپ سەنەمىز، - دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى سانيا دۇيسەنبى قىزى.

ورتالىق ديرەكتورى گۇلناز كيبرايەۆانىڭ ايتۋىنشا، اۋدانى 400 شارشى مەتر بولاتىن انگارلىق تيپتەگى جابىق مانەج ساپالى جىلۋ وقشاۋلاعىش ماتەريالداردان قىسقا مەرزىم ىشىندە تۇرعىزىلعان. بۇل يپپوتەراپيا ساباقتارىن قىستا دا وتكىزۋگە مۇمكىندىك بەرەدى.

- ءبىزدىڭ «مەرەي» بالالاردى وڭالتۋ ورتالىعى 2022 -جىلى اشىلدى. مۇندا سودان بەرى 40 تاربيەلەنۋشى بەيىمدەۋ مەن وڭالتۋدان تۇراقتى تۇردە وتۋدە. سولاردىڭ تورتەۋى قوعامعا ءساتتى بەيىمدەلىپ، مەكتەپكە، بالاباقشاعا بارىپ ءجۇر. ەندى، مىنە، ورتالىقتىڭ ەم شارالارىنا يپپوتەراپيا باعىتى قوسىلىپ وتىر. بالالار يپپوتەراپيادان ەم السا، اياققا تۇرىپ، ءجۇرۋى جاقسارادى، ارقا بۇلشىق ەتتەرى نىعايا تۇسەدى، ۆەستيبۋليارلىق اپپاراتى جاتتىقتىرىلادى. جالپى يپپوتەراپيا دەنساۋلىقتى جاقسارتۋمەن قاتار ودان ءارى دامۋىنا ۇلكەن ىقپال ەتەدى، - دەيدى گ. كيبايەۆا.

اداپتيۆتى اتپەن ءجۇرۋ ساباقتارىن اپتاسىنا ءۇش رەت وتكىزۋ جوسپارلانعان. ول ءۇشىن ورتالىق باسشىلىعى ەرەكشە قاجەتتىلىگى بار بالالارعا كومەكتەسۋگە ىقىلاس بىلدىرگەن «بەكنۇر» شارۋا قوجالىعىنان «اقبوز» جانە «ادميرال» اتتى ەكى جىلقىنى جالعا الىپ وتىر. بۇل جىلقىلاردى ەمگە پايدالانۋعا مەديتسينالىق ءبىلىمى بار ەمدىك دەنە شىنىقتىرۋدىڭ تاجىريبەلى ەكى نۇسقاۋشى كومەكتەسەدى.

ءوز كەزەگىندە پسيحولوگتار مەن دارىگەرلەردىڭ قورىتىندىسى مەن ۇسىنىستارى بويىنشا بالالار ەم الىپ، اتقا ءمىنۋدى باستايدى. ماسەلەن، ءتورت جاسار ءماديدى اجەسى شاكيزات سلامجانوۆا ورتالىققا ءبىر جارىم جاسىندا الىپ كەلگەن. بالا العاشىندا اياعىن باسىپ جۇرە الماعان، اينالاسىمەن قارىم-قاتىناسى دا قيىن بولاتىن. وزگە دە وڭالتۋ شارالارىمەن قاتار ءمادي بۇگىن نۇسقاۋشىلاردىڭ كومەگىمەن العاش رەت اتقا وتىرىپ، يپپوتەراپيانى باستادى.

سول سياقتى 8 جاسار مادياردىڭ اناسى ماقپال وسكەنبايەۆا دا الەمگە تانىمال وسى وڭالتۋ ءادىسى بالالارعا كومەكتەسەتىنىنە سەنىمدى.

- ءبىز يپپوتەراپيا اشۋ يدەياسى قولعا الىناتىنى تۋرالى العاش رەت وتكەن جىلى ەستىدىك. وبلىس باسشىلىعىنىڭ قولداۋىمەن وسى يگى باستاما ىسكە اسىرىلعانى قۋانىشتىمىز. مۇنداعى ماتەريالدىق- تەحنيكالىق جاراقتاندىرۋ، زاماناۋي جابدىقتار مەن ترەناجەرلەر، ەمدىك دەنە شىنىقتىرۋلارى بالالارىمىزدىڭ ساۋىعۋىنا، ءوز- وزىنە دەگەن سەنىمدەرىن نىعايتۋعا ىقپال ەتەدى دەگەن ۇمىتپەن كەلىپ وتىرمىز، - دەدى م. وسكەنبايەۆ.

مانەجدە مونتۋار، ياعني بالالاردى اتقا وتىرعىزۋعا ارنالعان ارنايى باسپالداق ورناتىلىپ، قاۋىپسىزدىك ماقساتىندا جاتتىعۋ الاڭىنا قۇم توسەلگەن. سونىمەن قاتار مۇندا جارىقتاندىرۋ جۇيەسى بار، اتا-انالار مەن ماماندار پروتسەستى سىرتتان باقىلاي الاتىنداي قورشاۋلار ورناتىلعان.

جالپى بۇگىنگى كۇنى «مەرەي» ورتالىعىندا تىرەك-قيمىل اپپاراتى زاقىمدانعان، داۋن سيندرومى جانە باسقا دا اۋرۋلارى بار 3 جاستان 18 جاسقا دەيىنگى بالالارعا 56 بىلىكتى مامان، سولاردىڭ ىشىندە پەداگوگ- تاربيەشى، ادىسكەر، دارىگەر-نەۆروپاتولوگ، پەداگوگ-پسيحولوگ، لوگوپەد، پسيحياتر، دەفەكتولوگ، ورتوپەد، ماسساجيست، ەمدىك دەنە شىنىقتىرۋ جانە ءجۇزۋ نۇسقاۋشىلارى، دەنە شىنىقتىرۋ وقىتۋشىسى، سونداي-اق ورتا مەديتسينالىق قىزمەتكەرلەر قىزمەت كورسەتەدى. تاربيەلەنۋشىلەرگە ىڭعايلى بولۋ ءۇشىن بالالاردى قاۋىپسىز تاسىمالداۋعا بەيىمدەلگەن ەكى «ۆيراج» گازەل بار.

ابىلايحان جۇماشەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى