جەتىسۋ وبلىسىندا قازاقشا ۇيرەنۋشىلەر قاتارى كوبەيدى
جەتىسۋ وبلىسىندا مەملەكەتتىك ءتىلدى ۇيرەنۋشىلەر قاتارى كوبەيىپ كەلەدى. بىلتىر «ءتىل» وقۋ- ادىستەمەلىك ورتالىعىنىڭ كۋرستارىنا قازاقشا ۇيرەنۋ ءۇشىن 818 ادام جازىلسا، بيىل بۇل سان 2267 ادامعا جەتكەن، دەپ حابارلايدى Kazinform.
وڭىردە بىلتىردان باستاپ قازاق ءتىلىن قىسقا مەرزىمدە وقىتۋ جوباسى - «قازاقشا سويلەيىك!» سويلەۋ پراكتيكاسىنىڭ كلۋبى جۇمىس ىستەي باستاعان. بۇل كلۋب تىڭداۋشىلارعا 1 جارىم اي ىشىندە قازاق تىلىندە سويلەۋدى قاراپايىم دەڭگەيدە ۇيرەنۋگە، بىرتىندەپ اۋىزشا سويلەۋدى مەڭگەرۋگە كومەكتەسەدى. ناتيجەسىندە ۇيرەنۋشىلەر تىلدىك كەدەرگىنى ەڭسەرۋگە جاردەمدەسىپ قانا قويماي، ءارى قاراي وقۋعا مۇمكىندىك الادى.
تالدىقورعانداعى «ءتىل» ورتالىعىنىڭ وقىتۋشىسى جانار ەلەسبايەۆانىڭ ايتۋىنشا، وقىتۋ ادىستەمەسىنىڭ سويلەسۋگە ىڭعايلى بولۋى ادامداردىڭ ءتىل ۇيرەنۋگە دەگەن ىنتاسىن ارتتىرادى ەكەن.
«بىزگە قىزمەت كورسەتۋ سالاسىندا جۇمىس ىستەيتىن تۇرعىندار ءجيى جۇگىنەدى. ءبىرىنشى كەزەكتە ولار قاراپايىم تۇرمىستا ايتىلاتىن سويلەمدەرگە يەك ارتا وتىرىپ، شاشتارازدا، كافەدە، ەمحانادا، دۇكەندە جانە جۇمىس ورىندارىندا ءوز كليەنتتەرىمەن بايلانىس جاساۋدى ۇيرەنەدى. سويلەۋ كلۋبىنداعى وقىتۋ ادىستەمەسى وسى پرينتسيپكە نەگىزدەلگەن. ءبىز تەگىن وقىتامىز. وتكەن جىلى وسى باعدارلامامەن 392 تىڭداۋشى ءبىلىم الدى، بيىل دا شامامەن 400-گە جۋىق تىڭداۋشى بولادى، - دەيدى جانار ەلەسبايەۆا.
سونداي- اق «ءتىل» وقۋ- ادىستەمەلىك ورتالىعىندا مەملەكەتتىك تىلدەن بولەك ورىسشا جانە اعىلشىنشا ۇيرەنۋگە دە مۇمكىندىك بار. قازىر ورتالىقتىڭ تالدىقورعانداعى جانە اۋدانداعى فيليالدارىندا قازاق، ورىس جانە اعىلشىن تىلدەرىن ءۇش مىڭعا جۋىق ادام ۇيرەنىپ ءجۇر ەكەن.
اۆتور
قالماحانبەت مۇقامەتقالي
