جەتىسۋ وبلىسىندا كولىك ۇرلاپ، ءىزىن سۋىتقان 33 جاستاعى ەر ادام ۇستالدى
تالدىقورعان. KAZINFORM - تالدىقورعان قالاسىنان جەڭىل كولىكتى ۇرلاعان 33 جاستاعى ازامات الماتى وبلىسى، بەساعاش اۋىلىندا تۇتقىندالىپ، قاماۋعا الىندى. تەرگەپ-تەكسەرۋ جۇمىستارى جالعاسىپ جاتىر.
جەتىسۋ وبلىستىق پوليتسيا دەپارتامەنتىنىڭ مالىمەتىنشە، كۇدىكتى Mercedes ماركالى اۆتوكولىكتى ۇرلاپ، بەساعاش اۋىلىنا جاسىرىنىپ ۇلگەرگەن. پوليتسيا قىزمەتكەرلەرى قىلمىس جاساعان ازاماتتىڭ مەكەن جايىن انىقتاپ، جەدەل ءىس-قيمىلدىڭ ناتيجەسىندە ونى تۇتقىنداعان. قازىر كولىك زاڭدى يەسىنە قايتارىلىپ، كۇدىكتى قاماۋعا الىندى.
- قازىرگى ۋاقىتتا تەرگەۋ جالعاسىپ جاتىر. زاڭناماعا سايكەس اۆتوكولىكتى ۇرلاعانى ءۇشىن قىلمىستىق جاۋاپكەرشىلىك قاراستىرىلعان. كىنالى ادامعا مىڭ ايلىق ەسەپتىك كورسەتكىشكە دەيىن ايىپپۇل، 600 ساعاتقا دەيىن تۇزەۋ نەمەسە قوعامدىق جۇمىستار، 2 جىلعا دەيىنگى مەرزىمگە باس بوستاندىعىن شەكتەۋ نەمەسە سول مەرزىمگە باس بوستاندىعىنان ايىرۋ جازاسى تاعايىندالۋى مۇمكىن، - دەلىنگەن وبلىستىق پوليتسيا دەپارتامەنتىنىڭ باسپا ءسوز قىزمەتى ۇسىنعان مالىمەتتە.
ايتا كەتەيىك پوليتسيا قىزمەتكەرلەرى ازاماتتارعا مۇقيات بولۋدى جانە ءوز مۇلكىن قورعاۋ ءۇشىن بارلىق ساقتىق شاراسىن جاساۋدى ەسكەرتەدى.
اۆتور
ايبەك قۇتتىبەك
