جەتىسۋ وبلىسىندا بيىلعى ون ايدا ونەركاسىپ ءوندىرىسى 3,9 پايىزعا وسكەن - پرەزيدەنت ساپارى
استانا. KAZINFORM - قاسىم-جومارت توقايەۆقا جەتىسۋ وبلىسىنىڭ اكىمى بەيبىت يسابايەۆ ءوڭىردىڭ الەۋمەتتىك-ەكونوميكالىق دامۋى تۋرالى باياندادى، دەپ حابارلايدى اقوردانىڭ باسپا ءسوز قىزمەتى.
وبلىس اكىمىنىڭ ايتۋىنشا، بيىلعى ءى جارتىجىلدىقتاعى جالپى وڭىرلىك ءونىم 6,2 پايىز وسىممەن 781 ميلليارد تەڭگەنى قۇراعان. ال جىل اياعىندا 7,1 پايىز وسىمگە قول جەتكىزىلمەك. ون ايدىڭ قورىتىندىسى بويىنشا قىسقا مەرزىمدى ەكونوميكالىق ينديكاتور 112,8 پايىزدى كورسەتكەن.
اۋىل شارۋاشىلىعىنىڭ دامۋىندا وڭ ديناميكا بار. سونداي-اق ءوندىرىس كولەمى، ونەركاسىپ، ساۋدا جانە قۇرىلىس سالالارى ىلگەرىلەي تۇسكەن. بيىل وڭىردە 247,6 مىڭ شارشى مەتر تۇرعىن ءۇي پايدالانۋعا بەرىلگەن. بۇل بىلتىرعى كورسەتكىشتەن 4,1 پايىزعا ارتىق.
مەملەكەت باسشىسىنا جاڭا ينۆەستورلاردى تارتۋ، وبلىستىڭ ينۆەستيتسيالىق تارتىمدىلىعىن ارتتىرۋ باعىتىنداعى جۇمىستار جونىندە ەسەپ بەرىلدى.
جىل باسىنان بەرى 1,3 ەسە وسىممەن 327,1 ميلليارد تەڭگە ينۆەستيتسيا تارتىلعان. وسى رەتتە جەكە ينۆەستيتسيالار سانى 1,6 ەسە وسكەن. بەيبىت يسابايەۆ 2024-2030-جىلدارعا ارنالعان قۇنى 3,5 تريلليون تەڭگە بولاتىن ينۆەستيتسيالىق پورتفەل قالىپتاستىرىلعانىن جەتكىزدى. ونىڭ اياسىندا 190 جوبا قولعا الىنىپ، 11,8 مىڭنان استام جۇمىس ورنى اشىلادى. بيىل 54,9 ميلليارد تەڭگەنى قۇرايتىن 48 جوبا ىسكە اسىرىلىپ جاتىر.
بۇدان بولەك، وڭىردەگى ونەركاسىپ سالاسى تۋرالى ايتىلدى. جەتىسۋ وبلىسىندا 549 كاسىپورىن تىركەلىپ، 30 مىڭنان استام ادام جۇمىسپەن قامتىلعان. بيىلعى ون ايدا ونەركاسىپ ءوندىرىسى 3,9 پايىزعا وسكەن.
قاسىم-جومارت توقايەۆ وڭىردەگى تىڭ باستامالاردى قۇپتادى. سونداي-اق الەۋمەتتىك-ەكونوميكالىق دامۋ قارقىنىن ساقتاپ، ءتيىستى جۇمىستاردى جالعاستىرۋدى تاپسىردى.
وسىعان دەيىن قاسىم-جومارت توقايەۆتىڭ جەتىسۋ وبلىسىنا جۇمىس ساپارى «تالدىقورعان» يندۋستريالىق ايماعىندا ورنالاسقان «ASMA INDUSTRIAL» وندىرىستىك اككۋمۋلياتور شىعارۋ زاۋىتىنىڭ جۇمىسىمەن تانىسۋدان باستالعانىن جازعان ەدىك.
