جەتىسۋ جولدارىنداعى كولىك اپاتىنان 123 ادام كوز جۇمدى
بيىل ەل اۋماعىنداعى جولداردا بولعان كولىك اپاتى 9 پايىزعا كوبەيگەن. بۇل جاعداي جەتىسۋ وبلىسىندا دا ءماز ەمەس.
جىل باسىنان بەرى 428 جول-كولىك وقيعاسى تىركەلىپ، اپات سالدارىنان 123 ادام قازا تاپقان. مەرت بولعانداردىڭ اراسىندا 20 بالا بار، دەپ حابارلايدى Kazinform.
جەتىسۋ وبلىسى پوليتسيا دەپارتامەنتى جەرگىلىكتى پوليتسيا قىزمەتىنىڭ باسشىسى، پوليتسيا پولكوۆنيگى قايسار مۇحمەتوۆتىڭ ايتۋىنشا، 13-19- قاراشا ارالىعىندا وڭىردە «جول قاۋىپسىزدىگى اپتالىعى» وتۋدە.
«اپتالىق اياسىندا ءتۇرلى ءىس-شارالار جوسپارلانعان. مىسالى «قامقور انا»، «جولاۋشى - بالا»، «ستۋدەنتتىك يدەيالار مەن باستامالار - جولدارداعى قاۋىپسىز قوزعالىس ءۇشىن»، «ۇزدىك اۆتومەكتەپ»، «ءبىز ومىرگە سەنەمىز!» سياقتى اتاۋلى باعىتتار جولدا ءجۇرۋ ەرەجەسى مەن قاۋىپسىزدىكتى قامتاماسىز ەتۋدى ناسيحاتتايدى. سونداي-اق دۇنيەجۇزىلىك كولىك وقيعالارى قۇرباندارىن ەسكە الۋ كۇنىندە جول پوليتسياسى قىزمەتكەرلەرى مەن تۇرعىندار اراسىنان شىققان ەرىكتىلەر قان تاپسىرۋ اكتسياسىن وتكىزەدى. بۇل شارا قوعام نازارىن جول قاۋىپسىزدىگىن ساقتاۋعا اۋدارىپ، ءتۇرلى اپاتتاردىڭ الدىن الۋعا سەپتىگىن تيگىزبەك. باستى ماقساتىمىز كولىك وقيعاسىنان زارداپ شەككەندەرگە كومەك كورسەتۋ جانە جول قوزعالىسىنا قاتىسۋشىلاردى ىنتىماقتاستىققا، جۇرگىزۋ مادەنيەتىن ارتتىرۋعا شاقىرۋ»، - دەيدى قايسار مۇحمەتوۆ.
بۇگىندە جەتىسۋ وڭىرىندە پاترۋلدىك پوليتسيا توپتارى تاۋلىك بويى جۇمىس ىستەۋدە. ولار 14 كامەرالى Ekin patrol قۇرىلعىسىمەن جابدىقتالعان.
