جەتپىس جاستاعى ەگىز قىزىق ەستەلىكتەرىن ءبولىستى

ولار ارال اۋدانىنىڭ اقكول دەگەن جەرىندە دۇنيەگە كەلگەن.

«ارامىز بەس-التى ساعات دەپ ايتىپ وتىراتىن ۇلكەندەر. شەشەمىزدىڭ تولعاعى قاتتى بولسا كەرەك. ءبىز تۋعاندا اۋەلى جاڭبىر، ارتىنان قار جاۋعان. ەسىمدەرىمىزدى جاڭبىرباي، قارجاۋباي دەپ قويعىسى كەلگەن ەكەن. ءبىراق اقىلداسا كەلە جانۇزاق، بايۇزاق اعالارىمىزعا ۇقساتىپ، اۋىستىرىپ جىبەرىپتى»، - دەدى كەنجەباي اعا.

ەكەۋىنىڭ بالالىق شاعى تەڭىز جاعاسىنداعى بۇرىنعى قاسقاقۇلان اۋىلىندا ءوتتى. ونجىلدىق مەكتەپتى سوندا ءبىتىردى.

«مەكتەپ بىتىرگەسىن اسكەرگە شاقىردى. ەگىزدەردى بولۋگە بولمايدى ەكەن عوي. ءسويتىپ، ءبىزدى بۇل جاقتان بىرگە جىبەرگەن. ءبىراق ءوزىمىز سياقتى جاس جىگىتتەر تولى پويىز دىتتەگەن جەرگە توقتاعاندا ەگىز بە، باسقا ما، قاراعان جوق. ءبولىنىپ كەتتىك. ەكەۋىمىزدىڭ دە و باستاعى قالاۋىمىز سول ەدى»، - دەدى ۇزاق اعا.

ەگىز بالا كوتەرۋدىڭ تۇقىم قۋالايتىنى عىلىمدا دالەلدەنگەن. ەرەجەپوۆتەر اۋلەتىندە دە سولاي. كەيىپكەرلەرىمىزدىڭ نەمەرە اعاسىنىڭ قوس ۇلى ەگىز ەكەن. بالا كۇنگى مىنا ءبىر ەستەلىك ءالى كۇنگە ۇزاق اعانىڭ جادىندا.

«ول كەزدە قالبىر شەلەكپەن قۇدىقتان سۋ تارتىپ ىشەمىز. ءبىر كۇنى ءسويتىپ جۇرگەندە كەنجەبايدىڭ اياعى تايىپ، قۇدىققا قۇلاپ كەتتى. ويىن بالاسىمىن، تارتىپ شىعاراتىن شامام جوق. جانۇشىرا ۇيگە قاراي جۇگىردىم. ۇلكەندەردىڭ كۇشىمەن باۋىرىم ءبىر بالەدەن امان قالعان»، - دەدى ول.

ەگىزدەردىڭ ۇلكەنى كوپ جىلدان بەرى قازالى قالاسىندا، ال كەنجەباي اعا اقتوبەدە تۇرىپ كەلەدى. سايالى بايتەرەكتەي ازاماتتار جەتپىستىڭ جوتاسىنا وتباسىمەن بىرگە ەسەن-ساۋ جەتىپ وتىر.

«1961 -جىلى ءبىرىنشى سىنىپقا 40 شاقتى وقۋشى بارىپ، سونىڭ 10 شاقتىسى عانا مەكتەپتى بىتىردىك. ول كەزدەگى بالالاردىڭ ءبارى دەرلىك عارىشكەر بولعىسى كەلەتىن. كەيىن ارمانىمىز ءجۇز تۇرلەندى. وكىنىشكە قاراي جوعارى ءبىلىم الاتىن مۇمكىندىك بولعان جوق. سوندا دا بالالاردى ەشكىمنەن كەم قىلماي وسىردىك»، - دەدى ۇزاق اعا.

ال كەنجەباي اعا 40 جىلدان استام ۋاقىت تەمىرجول سالاسىندا ەڭبەك ەتتى. ەگىزدەر ەكى وڭىردە تۇرسا دا جۋىردا مەرەيتويىن بىرگە قازالىدا اتاپ وتەدى.

«ارامىزدا ەشقاشان رەنىش بولعان ەمەس، بولمايدى دا. جارىق دۇنيەگە ءبىرىنشى كەلگەن باۋىرىما ءاردايىم جول بەرەمىن»، - دەدى كەنجەباي اعا.

نازەركە سانيازوۆا

اقپارات دەرەككوزى:

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى