جەتىم بالالارعا مەملەكەت بەرگەن پاتەردى جەكەشەلەندىرۋ قۇقىعى بەرىلدى

بۇل جايىندا سەنات دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.

- تۇرعىن ءۇيدىڭ قولجەتىمدىلىگىن ارتتىرۋ ماقساتىندا «باقىتتى وتباسى»، «شاڭىراق» باعدارلامالارى جۇمىس ىستەيدى، «وتاۋ» جانە «ناۋرىز» جاڭا جەڭىلدىكتى يپوتەكالىق باعدارلامالارى ىسكە قوسىلدى، وعان جەتىم بالالار مەن اتا-اناسىنىڭ قامقورلىعىنسىز قالعان بالالار قاتىسادى. تۇرعىن ءۇي ساياساتىن رەفورمالاۋ تۋرالى زاڭدا جەتىم جانە اتا-اناسىنىڭ قامقورلىعىنسىز قالعان بالالاردىڭ تۇرعىن ءۇيدى ءبىرىنشى كەزەكتە الۋ قۇقىعى ساقتالادى.

سونداي-اق ولارعا جانە حالىقتىڭ باسقا دا الەۋمەتتىك وسال توپتارىنا جالدامالى تۇرعىن ءۇيدىڭ جالپى كولەمىنىڭ كەمىندە 70 پايىزىنىن بەرۋ كوزدەلگەن. سونىمەن قاتار مەملەكەتتىك تۇرعىن ءۇي قورىنان بەرىلگەن تۇرعىن ءۇي- جايلاردى جەكەشەلەندىرۋ قۇقىعى (2024-جىلعى 22-قاراشادا  138-VIII قابىلداندى) بەرىلدى، - دەدى پرەمەر-- مينيستر.

ۇكىمەت باسشىسىنىڭ دەرەگىنشە، بۇدان باسقا، جەتىم بالالار مەن اتا-اناسىنىڭ قامقورلىعىنسىز قالعان بالالار ءۇشىن استانا، الماتى جانە شىمكەنت قالالارىندا كەزەككە تۇرعان كەزدە ءۇش جىل تىركەۋدە بولۋ جونىندەگى قولدانىستاعى تالاپ جويىلدى.

- بيىلعى 25-ساۋىردەن باستاپ «ناۋرىز» يپوتەكالىق باعدارلاماسىنا ءوتىنىم قابىلداۋ باستالدى. وسى باعدارلاماعا سايكەس حالىقتىڭ الەۋمەتتىك جاعىنان وسال توپتارى، ونىڭ ىشىندە جەتىم بالالار ءۇشىن كرەديت بويىنشا مولشەرلەمە 7 پايىزدى قۇرايدى. مەملەكەت باسشىسىنىڭ تاپسىرماسى بويىنشا وسى جىلدان باستاپ «مەيىرىم» قايىرىمدىلىق اكسياسى ىسكە اسىرىلۋدا. ونىڭ اياسىندا ءاربىر جەتىم بالاعا ماماندىق تاڭداۋدا، جۇمىسقا ورنالاسۋدا جانە تۇرعىن ۇيمەن قامتاماسىز ەتۋدە كومەك كورسەتەتىن «پاتروناتتىق» ۇيىم بەكىتىلەدى. وسىلايشا، جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ تۇرعىن ءۇي ماسەلەلەرىن شەشۋ بويىنشا جۇيەلى شارالار قابىلدانۋدا، - دەدى ولجاس بەكتەنوۆ.

بۇعان دەيىن بيىل جەتىم جانە اتا-اناسىنىڭ قامقورلىعىنسىز قالعان 1599 بالا باسپانالى بولعانىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى