جەتى كۇندىك كارانتين: وبلىستار اراسىندا مال كوشىرۋ تالابى كۇشەيتىلدى
استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ ءماجىلىس وتىرىسىنان كەيىن جۋرناليستەردىڭ سۇراعىنا بەرگەن جاۋابىندا اتىراۋ وبلىسىندا ءسىبىر جاراسىنىڭ وشاعى تىركەلۋىنە بايلانىستى پىكىر ءبىلدىردى.
- مەن مينيسترلىك قىزمەتكە كىرىسكەن كەزدە كەڭ اۋقىمدى تالداۋ جۇرگىزدىك. قازىر مال جانە ەگىن شارۋاشىلىقتارىندا سالىستىرمالى تۇردە ءتارتىپ بار. ۆەتەريناريا بويىنشا ماسەلەلەر بار. ءبىز ەندى جۇمىستى كۇشەيتىپ، تالاپتاردى قاتاڭداتىپ جاتىرمىز. اتىراۋ وبلىسىندا مال سويۋ الاڭىنىڭ وزىندە ءىرى قارا قىرىلعان. ول الاڭعا كارانتين جاريالادىق. قاجەتتى دەزينفەكتسيا شارالارىنىڭ ءبارىن ىستەدىك. ءقازىر باقىلاۋدا ۇستاپ وتىرمىز، - دەدى ول.
مينيستر قاۋىپتى ىندەتتەردىڭ الدىن الۋ ءۇشىن وبلىستار اراسىندا مال كوشىرۋدىڭ ءتارتىبى قاتاڭداتىلىپ جاتقانىن ايتتى.
- ءبىز جاڭا ءتارتىپ ەنگىزدىك. بۇرىن مالدى ءبىر وبلىستان ەكىنشى وبلىسقا ەشقانداي كارانتينسىز كوشىرە بەرەتىنبىز. قازىر 7 كۇندىك كارانتين ەنگىزدىك. مىسالى اتىراۋ وبلىسىنان قوستاناي وبلىسىنا مال كوشىرسە، اۋەلى اتىراۋدا 7 كۇن كارانتيندە ۇستالادى. ول جەردە ءبىزدىڭ ۆەتەرينارلار تەكسەرىپ، زەرتتەۋ جۇرگىزەدى. ال قوستانايعا جەتكەننەن كەيىن تاعى 7 كۇن كارانتيندە تۇرادى. بۇل جۇمىستى كۇشەيتىپ، ورىندالۋىن تالاپ ەتەمىز. حالىق تاراپىنان دا، ۆەتەرينارلار تاراپىنان دا وتە كوپ شاعىم بولادى. بۇل مالدىڭ قۇجاتتارى بىرىزدەندىرۋگە دە بايلانىستى. ياعني، اۋرۋ جۇقتىرىپ، تاراتپاۋ ءۇشىن مالدى كەشىكتىرمەي تىركەتىپ وتىرۋ كەرەك. مىسالى، ءتول تۋسا 7 كۇننىڭ ىشىندە اقپاراتتىق جۇيەگە تىركەلۋ كەرەك، - دەدى ايداربەك ساپاروۆ.
ەسىمجان ناقتىباي
اۆتور
