جۇرگىزۋشى كۋالىگىنەن ايىرىلعاندارعا موپەد مىنۋگە بولا ما - مامان جاۋابى
استانا. KAZINFORM - قازىر ەلوردا اۋماعىندا 1300 دەن استام موپەد رەسمي تىركەلدى.
موپەدتى زاڭداستىرۋ تۋرالى تولىعىراق استانا قالاسىنىڭ پوليتسيا دەپارتامەنتىنىڭ اكىمشىلىك پوليتسيا باسقارماسىنىڭ مەملەكەتتىك اۆتو-ينسپەكتورى بەكمۇرات ەرگەش ايتىپ بەردى.
- كۋالىك بولماعان جاعدايدا نەمەسە جۇرگىزۋشى كۋالىگىنەن ايىرىلعان جاعدايدا موپەدتى باسقارۋعا تىيىم سالىنادى، - دەپ قىسقا قايىردى بەكمۇرات ەرگەش استانا قالاسى كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، ەلوردادا جىل باسىنان بەرى موپەد جۇرگىزۋشىلەردىڭ قاتىسىمەن ءتورت كولىك اپاتى بولدى.
- ولاردىڭ جيى جاسايتىن قۇقىق بۇزۋشىلىق قاتارىنا، جاياۋ جۇرگىنشىلەر وتەتىن جەردە ەرەجەنى ساقتاماۋ، باعدارشامنىڭ تىيىم سالىنعان تۇسىنەن ءوتىپ كەتۋ. ءتورت كولىك اپاتى جاعدايىندا دا موپەدشى كىنالى. جول ەرەجەلەرىن بۇزعانى ءۇشىن اكىمشىلىك قۇقىق بۇزۋشىلىق كودەكسىنە سايكەس جاۋاپكەرشىلىك قاراستىرىلعان، - دەيدى ول.
بۇگىنگە دەيىن ەلوردادا رەسمي 1341 موپەد تىركەلىپ، كۋالىك بەرىلدى.
ايتا كەتەيىك، ەل اۋماعىندا بيىل 5-ساۋىرگە دەيىن موپەدتەردى رەسمي تىركەۋ مىندەتى قويىلدى. وسى ورايدا تىركەمەگەندەرگە قانداي جاۋاپكەرشىلىك كوزدەلگەنىن جازعان بولاتىنبىز.
بىرنەشە كۇن بۇرىن الماتىدا موپەدتەردى تىركەۋ پروتسەسىنە رەيد جۇرگىزىلدى.
ەسكە سالايىق، جول ەرەجەسىن بۇزعان موپەد جۇرگىزۋشىلەرىنە جازا قاتاڭداتىلادى.
