جۇرتىمىز مەملەكەتتى باسقارۋدىڭ بۇرىنعى ءتاسىلىن قايتارۋعا جول بەرمەيتىنىنە سەنىمىم مول - پرەزيدەنت

«ەكى جىلعا دا جەتپەيتىن از ۋاقىتتا ەلىمىزدە ىسكە اسىرىلعان رەفورمالار حالىقتىڭ ساياسي سانا- سەزىمىن ەداۋىر وزگەرتتى. ەندى جۇرتىمىز مەملەكەتتى باسقارۋدىڭ بۇرىنعى ءتاسىلىن قايتارۋعا جول بەرمەيتىنىنە سەنىمىم مول. رەفورمالاردان كەيىن وتكەنگە قايتا ورالمايمىز. وزگەرىستەر ءالى جالعاسادى جانە مەملەكەتىمىزدىڭ سيپاتىن تولىق وزگەرتەدى. ءبىراق ءبىز رەفورمانى جۇزەگە اسىرعاندا، ەڭ الدىمەن، ىشكى ساياسي تۇراقتىلىقتىڭ ماڭىزدىلىعىن ەستەن شىعارماۋىمىز كەرەك. ايتپەسە قازاقستاننىڭ مەملەكەتتىلىگىنە زور قاۋىپ- قاتەر ءتونۋى جانە ونىڭ سالدارى ۇلت بولاشاعى ءۇشىن وتە اۋىر بولۋى مۇمكىن»، - دەدى پرەزيدەنت.

قاسىم- جومارت توقايەۆ سوندىقتان ءاربىر ازامات زاڭ مەن ءتارتىپتى ساقتاۋى كەرەك دەپ ۇنەمى ايتىپ جۇرگەنىن ەسكە سالدى.

«ءبىز سوزبەن دە، ىسپەن دە قوعامدى ورتاق ماقساتقا جۇمىلدىرۋعا جانە جالپى ۇلتتىق بىرلىكتى نىعايتا بەرۋگە ءتيىسپىز. حالقىمىز ازات ەل بولىپ، مىقتى ءارى ادىلەتتى مەملەكەت قۇرۋ تۋرالى ارمانىن بەرەكە- بىرلىگىنىڭ ارقاسىندا عاسىرلار تەزىنەن امان الىپ شىعىپ، اقيقاتقا اينالدىردى»، - دەدى مەملەكەت باسشىسى.

ەلىمىز وكتەمدىك پەن وشپەندىلىككە، قوعامدىق ءتارتىپتى اياق استى ەتۋگە، زورلىق- زومبىلىققا شاقىرۋعا، ازاماتتاردىڭ ار- نامىسىن تاپتايتىن ارەكەتتەر جاساۋعا جول بەرمەيدى.

«مەملەكەتتىلىك تۇعىرىن نىعايتا ءتۇسۋ ءۇشىن زاڭ ۇستەمدىگىن ورنىقتىرۋ وتە ماڭىزدى. تارتىپكە باعىنعان قوعام وركەنيەتتى بولادى. بۇل - زاڭدىلىق. ءار ازامات ەلىمىزدىڭ زاڭىن قۇرمەتتەسە، بەرەكە- بىرلىك تە، باقۋاتتى تۇرمىس تا بولادى. ادىلەتتى قازاقستاندى قۇرۋ ءۇشىن قۇقىقتىق مادەنيەتتى دامىتۋ قاجەت. زاڭسىزدىق، تارتىپسىزدىك، مادەنيەتسىزدىك ەلدى جارعا جىعادى. مۇنداي جاعىمسىز ۇردىستەرگە بۇكىل قوعام بولىپ قارسى تۇرۋىمىز كەرەك. وسىنى ساناعا مىقتاپ سىڭىرگەن ءجون. ءبىز بىرتىندەپ قوعامدى وزگەرتۋ جانە دەموكراتيا قاعيداتتارىن ەنگىزۋ جولىنان اينىمايمىز»، - دەدى قاسىم- جومارت توقايەۆ.

پرەزيدەنت الەمدە ساياسي جانە ەكونوميكالىق احۋال قۇبىلىپ تۇرعان زاماندا زاڭ جانە قۇقىق ۇستەمدىگىن قامتاماسىز ەتۋ وتە ماڭىزدى ەكەندىگىن باسا ايتتى.

«مەملەكەت راديكاليزمنىڭ، ەكسترەميزمنىڭ، قۇقىقتىق نيگيليزمنىڭ جانە تۇرمىستىق ۆانداليزمنىڭ كەز كەلگەن كورىنىسىنە مۇلدەم توزبەۋشىلىك ساياساتىن ۇستاناتىن بولادى. ەلىمىز وكتەمدىك پەن وشپەندىلىككە، قوعامدىق ءتارتىپتى اياق استى ەتۋگە، زورلىق- زومبىلىققا شاقىرۋعا، ازاماتتاردىڭ ار- نامىسىن تاپتايتىن ارەكەتتەر جاساۋعا جول بەرمەيدى. زاڭعا قايشى كەلەتىن، ازاماتتاردىڭ اراسىنا ىرىتكى سالاتىن جانە تۇراقتىلىققا سىنا قاعاتىن كەز كەلگەن ءسوز بەن ارەكەتكە قاتاڭ توسقاۋىل قويادى. بۇل تالاپقا باعىنباۋ مەملەكەتكە دە، قوعامعا دا قارسى شىعۋ دەپ باعالانادى. مۇنى ءبارىن، اسىرەسە، ەل الدىندا جۇرگەن جانە حالىققا ءسوزى ءوتىمدى ازاماتتار تەرەڭ ءتۇسىنۋى كەرەك»، - دەدى مەملەكەت باسشىسى.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى