جۋرناليستەردى قورعايتىن ەشقانداي مەحانيزم جوق - نۇرتورە ءجۇسىپ
پارلامەنت سەناتىنىڭ دەپۋتاتى، الەۋمەتتىك- مادەني دامۋ جانە عىلىم كوميتەتىنىڭ ءتوراعاسى نۇرتورە ءجۇسىپ جۋرناليستەردىڭ ەش ساناتقا جاتپايتىنىن، ولاردى قورعايتىن مەحانيزم كەرەگىن ايتتى، دەپ حابارلايدى Kazinform.
«ماسس مەديا تۋرالى» زاڭ وتە ماڭىزدى دەپ ەسەپتەيمىن. اقپارات قۇرالدارىنىڭ ءومىر ءسۇرۋى، تىكەلەي قىزمەت ەتۋ اياسى وسى زاڭدا قامتىلاتىن بولعاندىقتان، بۇل زاڭعا قوعام تاراپىنان ۇلكەن كوڭىل ءبولىنىپ وتىرعانىن ايتۋ كەرەك. قازىرگى ب ا ق تۋرالى قولدانىستاعى زاڭ دا جامان ەمەس، ءبىراق زامان وزگەردى عوي، ول زاڭدا سيفرلىق جۇيە، الەۋمەتتىك جەلى، بلوگەرلىك ۇعىمدارى بولعان جوق. جۋرناليستەر مارتەبەسىنە كەلسەك، ۇستازدار مارتەبەسىندەي ارنايى مارتەبە كەرەك ەمەس. ءبىراق قىزمەت بويىنشا مەملەكەتتىك رەەستر بار، سول رەەستردە جۋرناليست ماماندىعى جوق، رەداكتور، كوررەكتورلار عانا كورسەتىلگەن. جالپى جۋرناليستەر قاۋىمى مەملەكەتتىك قىزمەتكەرلەر، بيۋدجەت قىزمەتكەرلەرى سىندى ەش ساناتقا جاتپايدى»، - دەدى ن. ءجۇسىپ Jibek joly تەلەارناسىنداعى «ۋادە» باعدارلاماسىندا.
سەنات دەپۋتاتى جۋرناليستەردى زەينەتاقى ماسەلەسىندە، تۇرعىن ءۇي باعدارلامالارىنا قاتىسۋىندا قولداۋ كەرەگىن ايتتى.
«كەشەگى پاندەميا كەزىندە جۋرناليستەر مەن وپەراتورلار باسىن قاتەرگە تىگىپ جۇمىس ىستەدى، ەڭ وزەكتى وشاقتاردان حابار بەردى، ولاردىڭ دا اۋىرىپ قالۋى، ءولىپ قالۋى دا مۇمكىن ەدى عوي. سول كەزدە اۋىرىپ قالعان دارىگەرگە ەكى ميلليوننان تولەندى، قايتىس بولعان دارىگەرلەرگە 10 ميلليون تەڭگەدەن تولەندى. جۋرناليست سوندا ادام ەمەس پە؟ ول تاۋەكەلگە بارمادى ما؟ ءسىز بەن ءبىز بولماساق، ونى كىم قورعاۋى كەرەك ەدى؟ سوندىقتان مارتەبە بولا ما، مارتەبەسىز بولا ما، جۋرناليستەردى قورعايتىن مەحانيزم كەرەك دەپ ەسەپتەيمىن. زاڭ جۋرناليستەردىڭ جۇمىس ىستەۋىنە، كاسىبي مىندەتىن اتقارۋىنا، شىعارماشىلىق ەركىندىگىنە مۇمكىندىك بەرۋى كەرەك»، - دەيدى نۇرتورە ءجۇسىپ.
ايتا كەتەيىك، 30-قاراشادا ءماجىلىس «ماسس- مەديا» تۋرالى زاڭ جوباسىن ءبىرىنشى وقىلىمدا ماقۇلدادى.
مادەنيەت جانە اقپارات ءمينيسترى ايدا بالايەۆانىڭ ايتۋىنشا، قازىرگى ۋاقىتتا جۇمىس توبىنىڭ وتىرىستارىندا تالقىلاۋ جۇمىستارى جالعاسۋدا. اتاپ ايتقاندا، جۋرناليستەر مەن ءماجىلىس دەپۋتاتتارىنىڭ پىكىرىن ەسكەرە وتىرىپ، باسپا ءسوز كارتاسى ۇعىمىن ايقىنداۋ تاسىلدەرى قايتا قارالاتىن بولادى.
