جەراستى ۇلتتىق بايلىعىمىزدى ەڭ ءبىرىنشى مەملەكەتتىك كومپانيالارعا بەرۋ قاجەت - ولجاس بەكتەنوۆ

- ءبىرىنشى. ونەركاسىپ جانە ەنەرگەتيكا مينيسترلىكتەرى گەولوگيالىق بارلاۋعا ينۆەستيتسيالار تارتۋ، ونىڭ ىشىندە «تەرەڭ» قاباتتار مەن كۇردەلى كەن ورىندارىن يگەرۋ كەزىندە جەڭىلدىكتەر بەرۋ بويىنشا ناقتى تەتىكتەر مەن قاجەتتى زاڭنامالىق تۇزەتۋلەر ازىرلەسىن. ەكىنشى. ونەركاسىپ مينيسترلىگى ساۋدا مينيسترلىگىمەن جانە «سامۇرىق- قازىنا» قورىمەن بىرلەسىپ، تاۋ جىنىستارىن تالدامالىق زەرتتەۋ بويىنشا حالىقارالىق ستاندارتتارعا ساي كەلەتىن مامانداندىرىلعان اككرەديتتەلگەن زەرتحانانى قۇرۋعا ءتيىس. ءۇشىنشى. ونەركاسىپ جانە ەنەرگەتيكا مينيسترلىكتەرى «سامۇرىق- قازىنا» قورىمەن بىرلەسىپ، ۇلتتىق گەولوگيالىق قىزمەت بازاسىندا عىلىمي ەكولوگيالىق- گەولوگيالىق كلاستەر قۇرۋ جۇمىسىن جۇرگىزسىن، - دەدى ولجاس بەكتەنوۆ.

ونىڭ اتاپ وتۋىنشە، باستاپقى كەزەڭدە «تاۋ- كەن سامۇرىق» كومپانياسىنىڭ قولدانىستاعى تەحنولوگيالىق مۇمكىندىكتەرىن پايدالانۋ كەرەك. جالپى، «تاۋ-كەن سامۇرىق» كومپانياسىنا قولداۋ كورسەتىپ، دامىتۋ قاجەت.

- ءبىز ءوزىمىزدىڭ جەراستى ۇلتتىق بايلىعىمىزدى بىرىنشىدەن مەملەكەتتىك كومپانيالارعا بەرىپ، بارلاۋ جۇرگىزىپ، ونى دامىتىپ، يگەرىپ، سودان كەيىن ينۆەستورلار تارتۋىمىز قاجەت. سوندا عانا ونىڭ باعاسى وسەدى جانە پايداسىن مەملەكەت كورەدى. وسى تەتىكتى كەڭىنەن قولدانۋ كەرەك، - دەدى ول.

تورتىنشىدەن، ۇكىمەت باسشىسى ونەركاسىپ مينيسترلىگى ەنەرگەتيكا، سيفرلاندىرۋ جانە قارجى مينيسترلىكتەرىمەن بىرلەسىپ، جىل سوڭىنا دەيىن ايرىقشا ماڭىزى بار الاڭدارداعى اەروگەوفيزيكالىق ءتۇسىرىلىم جۇمىستارىن قارجىلاندىرۋ مەن جۇرگىزۋدىڭ پارمەندى تەتىگىن ازىرلەۋى تيىستىگىنە اۋداردى.

- بەسىنشى. ونەركاسىپ مينيسترلىگى قارجى، تسيفرلىق دامۋ مينيسترلىكتەرىمەن جانە ۇلتتىق گەولوگيالىق قىزمەتپەن بىرلەسىپ، تاريحي دەرەكتەردى سيفرلاندىرۋدى جانداندىرۋى قاجەت. سونداي- اق، ونى ساقتاۋ بويىنشا ءتيىستى جۇمىستاردى جۇرگىزۋ كەرەك، - دەدى ولجاس بەكتەنوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى