جەر سىلكىنىسى كەزىندە ۇشاقتار الماتىعا قونا المادى

23-قاڭتاردا جەرگىلىكتى ۋاقىت بويىنشا ساعات 00.10-دا الماتىدا جەر سىلكىنىسى بولدى، ول اۋە قوزعالىسىن باسقارۋدىڭ اۆتوماتتاندىرىلعان جۇيەسىنىڭ «مۇناراسىندا» ايتارلىقتاي سەزىلدى.

ايەرودروم اۋدانىندا قونۋعا بەت العان 5 اۋە كەمەسى بولدى، ونىڭ ىشىندە 1 ۇشاق قونىپ ۇلگەردى. 4 اۋە كەمەسى جەر سىلكىنىسى تۋرالى حاباردار ەتىلدى جانە اۋە قوزعالىسىن باسقارۋ ورگاندارىنا تاپسىرۋمەن ايەرودروم ايماعىندا كۇتۋ ۇيىمداستىرىلدى. وسىدان كەيىن ايەرودرومدى باسقارۋ ورتالىعىنىڭ باسشىسى مۇنارادان ەۆاكۋاتسيالاۋعا شەشىم قابىلدادى.

ايەرودرومدى باسقارۋ ورتالىعىندا اۋە قوزعالىسىن باسقارۋ 20 مينۋتقا سوزىلدى. ودان ءارى جەراستى دۇمپۋلەرى توقتاعان سوڭ، ايەرودرومدى باسقارۋ ورتالىعى قايتادان جۇمىسىن باستادى.

قونۋى ءتيىس 4 ۇشاقتىڭ ءبىرى - استانا-الماتى باعىتىنداعى ەير استانانىڭ ك س-856 رەيسىنىڭ ۇشاعى تۇركىستاننىڭ قوسالقى ايەرودرومىنا قوندى. قالعان ۇشەۋى ەش قيىندىقسىز الماتى اۋەجايىنا قوندى.

ساعات 00: 39-دان باستاپ اۋەجاي شتاتتىق رەجيمدە جۇمىس ىستەي باستادى. قوسالقى ايەدرومعا اتتانعان ك س-856 رەيسى تۇركىستاننان 02.32-دە الماتىعا ۇشىپ، 03.34-تە ءساتتى قوندى.

كەزەكشى اۋىسىم كۇتپەگەن جاعدايدا جوسپارعا سايكەس ارەكەت ەتتى.

اۆتور

ەركەجان سماعۇلوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى