جەر سىلكىنىسى: جەر استى ميكرودۇمپۋلەرىن انىقتايتىن ءۇش قوسىمشا جىلجىمالى ستانسيا ورناتىلدى

جامبىل وبلىسىنا كەلگەن قازاقستان ت ج م سەيسمولوگيالىق بايقاۋ جانە زەرتتەۋ ۇلتتىق عىلىمي ورتالىعىنىڭ ماماندارى سەيسميكالىق جاعدايدى ەگجەي-تەگجەيلى مونيتورينگىلەۋ مەن تالداۋدى جالعاستىرىپ جاتىر.

- سەيسمولوگيالىق ستانسيالار جەلىسى مەركى اۋدانىندا ەپيورتالىق ايماعىندا ورنالاستىرىلعان. تريانگۋلياتسيا ادىسىمەن جۇمىس ىستەيتىن ءۇش قوسىمشا جىلجىمالى ستانسيا ورناتىلدى. ولار ەپيورتالىقتان 30-80 ك م راديۋستا: جەر قىرتىسىنىڭ قوزعالىسىن، جەر استى ميكرودۇمپۋلەردى جانە جەر استى شۋلاردى انىقتايدى، - دەلىنگەن حابارلامادا.

بۇل دەرەكتەر ىقتيمال افتەرشوك بەلسەندىلىگىن ەگجەي-تەگجەيلى زەرتتەۋگە جانە ىقتيمال تاۋەكەلدەردى باعالاۋعا مۇمكىندىك بەرەدى.

- جينالعان دەرەكتەر جەدەل رەجيمدە سەيسميكالىق جاعدايدى باعالاۋ جونىندەگى كوميسسيانىڭ تالداۋى مەن جۇمىسى ءۇشىن ورتالىق سەيسميكالىق وبسەرۆاتورياعا بەرىلەدى. ناتيجەسىندە قورىتىندى دايىندالىپ، قازاقستان ت ج م كوماندالىق ورتالىعىنا جىبەرىلەدى. بۇل ناقتى ۋاقىت رەجيمىندە جاعدايدى تالداۋعا جانە حالىقتىڭ قاۋىپسىزدىگىن قامتاماسىز ەتۋ ءۇشىن قاجەتتى شارالاردى قابىلداۋعا مۇمكىندىك بەرەدى، - دەلىنگەن حابارلامادا.

قازىرگى ۋاقىتتا جامبىل وبلىسىندا ت ج م س ب ز ع و 9 سەيسمولوگيالىق ستانسياسى جۇمىس ىستەيدى، ولاردىڭ ءبىرى - كەشەندى، بىرنەشە پارامەترلەردى تالداۋ مۇمكىندىگى بار. قوسىمشا ستانسيالار باقىلاۋ دالدىگىن جاقسارتادى جانە سەيسميكالىق بەلسەندىلىكتىڭ وزگەرۋىنە جەدەل دەن قويۋعا كومەكتەسەدى.

قازاقستان ت ج م جاعدايدى باقىلاۋدا ۇستاپ، ازاماتتاردىڭ قاۋىپسىزدىگىن قامتاماسىز ەتۋ ءۇشىن بارلىق قاجەتتى شارالاردى قابىلداپ جاتىر.

ەسكە سالساق، جەر سىلكىنىسى بويىنشا 104 ارىز-شاعىم ءتۇسىپ، 17 الەۋمەتتىك نىسان بۇلىنگەن.

ايتا كەتەلىك جامبىل وبلىسىندا جەر سىلكىنىسىنىڭ سالدارىن باعالاۋ جونىندەگى ۇكىمەتتىك توپتىڭ جۇمىسى جالعاسىپ جاتقانىن جانە ۇكىمەتتىك جۇمىس توبى جەر سىلكىنىسىنەن زاقىمدانعان نىسانداردى ارالاعانى تۋرالى جازعان ەدىك.

ەسكە سالا كەتەيىك، بۇعان دەيىن الماتىدان 323 شاقىرىم جەردە جەر سىلكىنىسى تىركەلگەنىن جازعان بولاتىنبىز. ەسەپتەلگەن قارقىندىلىعى مەركى اۋىلىندا - 5.0 بال، قۇلان اۋىلىندا - 4.0 بال، شۋ قالاسىندا - 2.0 بال شاماسىندا بولعان.

بۇعان دەيىن حابارلانعانداي، سەيسميكالىق احۋالدى باقىلاۋ جونىندەگى جەدەل شتاب 24/7 تارتىبىندە جۇمىس ىستەپ جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى