جۇمىسپەن قامتۋدا «تىزەسى شىققان» شارالاردى قولدانۋدامىز - اسحات ايماعامبەتوۆ
استانا. KAZINFORM - ءماجىلىس دەپۋتاتى اسحات ايماعامبەتوۆ ەڭبەك نارىعىنداعى تەڭسىزدىك پەن ماماندار تاپشىلىعى ماسەلەسىن كوتەردى.
«ءبىز مامان جەتىسپەيدى دەيمىز، ءبىراق «گيدرومەليوراتسيا» ماماندىعىنا بولىنگەن گرانتتارعا بىردە-ءبىر ادام ءوتىنىش بەرمەگەن. ياعني كونكۋرستا 0 ادام بولدى. كولىك قۇرىلىستارى بويىنشا بولىنگەن 300 گرانتتىڭ تەك 29-ىنا ادام قابىلداندى. ياعني ءبىر گرانتقا 0,1 ادام كەلىپ وتىر. بۇل مىسالدار كادر تاپشىلىعى كۇردەلى ماسەلە ەكەنىن ايقىن كورسەتەدى. ياعني پروبلەما تەك گرانت سانىندا الدە ونىڭ دۇرىس بولىنبەۋىندە عانا ەمەس. ءتىپتى، ولاردى دايىندايتىن كوللەدجدەر مەن ۋنيۆەرسيتەتتەردىڭ بولماۋىندا نەمەسە ولاردىڭ وقىتۋ ساپاسىندا ەمەستىگى بارىمىزگە انىق دەپ ويلايمىن»، - دەدى ا. ايماعامبەتوۆ ماجىلىستە «قازاقستاننىڭ ەڭبەك نارىعىن دامىتۋ جانە كادرلىق الەۋەتىن نىعايتۋ» اتتى ۇكىمەت ساعاتىندا.
ونىڭ ايتۋىنشا، 2008 -جىلدان باستاپ جۇمىسپەن قامتۋدىڭ 5 باعدارلاماسى قابىلداندى. ياعني ءار ەكى جىل سايىن جاڭا باعدارلاما قابىلدانىپ وتىرعان.
«ولار قانداي ناتيجە بەردى؟ ەگەر جۇمىسپەن قامتۋ شارالارىن نەگىزگى قۇرالدارى مەن ادىستەرى ارقىلى تالدايتىن بولساق، وسى جىلدار بويى كونسەپتۋالدى تۇردە ايتارلىقتاي وزگەرمەگەنىن جانە نەگىزىنەن ۋاقىتشا سيپاتتا بولعانىن بايقايمىز. ءبىز ءالى كۇنگە دەيىن كوبىنەسە «تىزەسى شىققان» شارالاردى قولدانۋدامىز. جاڭا جۇيەلى شارالار از، سول باياعى ۋاقىتشا جۇمىس ورىندارىن قۇرۋ، وقىتۋ جانە قايتا وقىتۋ، شاعىن نەسيە بەرۋ جانە باسقالارى. ال جەرگىلىكتى دەڭگەيدە بۇل شارالار قوعامدىق جۇمىستارعا تارتۋدان، الەۋمەتتىك جۇمىس ورىندارىن ۇسىنۋدان جانە جاستار پراكتيكاسىنان اسا الماي وتىر. وسى شارالاردىڭ قانشالىقتى ءتيىمدى ەكەنىن دە زەرتتەپ جاتقان ەشكىم جوق»، - دەيدى دەپۋتات.
ا. ايماعامبەتوۆ ۇكىمەت ەسەبىندە جىل سايىن شامامەن 900 مىڭ ادام جۇمىسقا ورنالاساتىنىن، جىلىنا ميلليونعا جۋىق ادام جۇمىسقا ورنالاسسا دا، جۇمىسسىزدىق دەڭگەيى وزگەرىسسىز قالىپ وتىرعانىن سىنعا الدى.
