جەمقورلىقپەن كۇرەس. قازاقستان نەلىكتەن گرۋزيا جولىمەن جۇرمەيدى
استانا. KAZINFORM - وزگە ەلدەردە جەمقورلىقپەن كۇرەسكە باعىتتالعان ريەۆوليۋتسيالىق ءادىس بارلىق ۋاقىتتا بىردەي قازاقستانعا ساي كەلە بەرمەيدى.
بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي Jibek Joly تەلەارناسىنىڭ «ۋادە» باعدارلاماسىنا بەرگەن ەكسكليۋزيۆتى سۇحباتىندا ايتتى.
قازاقستان نەلىكتەن گرۋزيا سەناريىن قايتالامايدى؟
2000-جىلداردىڭ باسىندا گرۋزيا ىشكى ىستەر مينيسترلىگى قىزمەتكەرلەرىن جاپپاي جۇمىستان بوساتىپ، مەملەكەتتىك قىزمەت جۇيەسىن قايتا ىسكە قوسقان بولاتىن. بۇل باستاما جەمقورلىققا قارسى قۋاتتى اسەر بەرگەن ەدى. ال اگەنتتىك ءتوراعاسى اسحات جۇماعالي وزگەنىڭ مۇنداي رەفورمالارىن باسى-كوزى جوق كوشىرىپ الۋ بارلىق ۋاقىتتا ءتيىمدى بولمايتىندىعىن العا تارتادى.
- ەلدىڭ قانداي ءبىر تاجىريبەسىن، حالىقارالىق تاجىريبەنى، قۇرالدى الىپ جاي عانا كوشىرۋدى، ونى قوعامىمىزدا، قۇرىلىمدارىمىزدا، مەملەكەتىمىزدە قولدانۋدى جاقتامايمىن. ءاربىر جاعدايدىڭ، ءار مەملەكەتتىڭ وزىندىك ەرەكشەلىكتەرى - ءتيىستى قۇقىقتىق جۇيەسى، ادامداردىڭ سانا-سەزىمى، ادامگەرشىلىگى، مادەنيەتى بار، - دەپ سانايدى ول.
وسى ورايدا باعدارلاما جۇرگىزۋشىسى مەملەكەتتىك قىزمەتشىلەردىڭ جالاقىسىن كوتەرۋ ارقىلى جەمقورلىقپەن كۇرەستە جەتىستىككە جەتكەن سينگاپۋر مەن دانيانى مىسالعا كەلتىرە وتىرىپ، قازاقستاندا دا مۇنداي باستاما جۇمىس ىستەۋى مۇمكىن بە ەكەندىگىن سۇراعان بولاتىن.
اسقار جۇماعاليدىڭ ايتۋىنشا، شەنەۋنىكتەردىڭ تابىسىنىڭ ارتۋى شىنىمەن دە ولاردىڭ پارا الۋعا دەگەن ىنتاسىن تومەندەتەدى. بۇگىندە بۇل ەلىمىزدەگى جەمقورلىققا قارسى شارالاردىڭ بولىگى سانالادى.
- ارينە، ەگەر مەملەكەتتىك قىزمەتشى ءوزىنىڭ مىندەتتەرىن لايىقتى دەڭگەيدە ورىنداسا جانە الەۋمەتتىك پاكەتى بولسا، وندا جاقسى جالاقى الادى. بۇل جەمقورلىق ارەكەت مۇمكىندىگىن جانە ونى جاساۋعا دەگەن نيەتتى ايتارلىقتاي تومەندەتەدى، - دەدى ول.
بۇعان دەيىن انتيكور باسشىسى ەلىمىزدەگى سيفرلىق «بويالعان» اقشا جوباسىنىڭ العاشقى ناتيجەسى جايلى ايتىپ بەرگەنىن جازعان ەدىك.
بۇدان بولەك ول مەملەكەتتىك قىزمەتشىلەر تەكسەرۋشى ورگانداردان قورقاتىندىقتان شەشىم قابىلداۋ بارىسىندا جيى قاۋىپتەنەتىنىن اتاپ ءوتتى.
