جەمقورلىق تۋرالى حابارلاساڭىز 15,7 ميلليون تەڭگە سىياقى الاسىز: انتيكور WhatsApp چات- بوتىن ىسكە قوستى
استانا. KAZINFORM - انتيكور ازاماتتارعا ارنالعان WhatsApp چات-بوتىن ىسكە قوستى.
- قازىرگى تاڭدا جەمقورلىققا قارسى ءتيىمدى ءىس-قيمىل قوعامنىڭ بەلسەندى قاتىسۋىمەن جانە قولداۋىمەن جۇزەگە اسادى. سىبايلاس جەمقورلىققا قارسى مادەنيەتتى جانە جەمقورلىق كورىنىستەرىنە نولدىك توزىمدىلىكتى قالىپتاستىرۋ، سونداي-اق ازاماتتىق بەلسەندىلىكتى ارتتىرۋ ماقساتىندا سىبايلاس جەمقورلىققا قارسى قىزمەت جەمقورلىق فاكتىلەرى تۋرالى جەدەل حابارلاۋ ءۇشىن جاڭا قۇرالدى ەنگىزەدى. ءبىز جاڭا انتيكور 1424 Whatsapp-چات-بوتىنىڭ ىسكە قوسىلعانىن قۋانىشپەن حابارلايمىز. ەندى ءاربىر ازامات جەمقورلىق فاكتىلەرى تۋرالى حابارلاي الادى نەمەسە WhatsApp مەسسەندجەرى ارقىلى سىبايلاس جەمقورلىققا قارسى ءىس-قيمىل ماسەلەلەرى بويىنشا كەڭەس الا الادى. ول ءۇشىن 87770001424 نومىرىنە حابارلاما جىبەرۋ جەتكىلىكتى، - دەلىنگەن حابارلامادا.
انتيكور 1424 WhatsApp-چات-بوت ارقىلى نە ىستەۋگە بولادى؟
✅ سىبايلاس جەمقورلىق فاكتىلەرى تۋرالى حابارلاۋ
✅ سىبايلاس جەمقورلىققا قارسى ءىس-قيمىل ماسەلەلەرى بويىنشا كەڭەس الۋ
سىبايلاس جەمقورلىق قۇقىق بۇزۋشىلىقتار تۋرالى شىنايى اقپارات بەرگەنى ءۇشىن 15,7 ميلليون تەڭگەگە دەيىن سىياقى كوزدەلگەن.
- ءبىز ءوتىنىشتىڭ تولىق قۇپيالىلىعىنا كەپىلدىك بەرەمىز. بارلىق حابارلامالار مىندەتتى تۇردە قارالادى جانە قۇقىق بۇزۋشىلىقتار انىقتالعان جاعدايدا قولدانىستاعى زاڭناماعا سايكەس شارالار قابىلدانادى. الايدا، سىبايلاس جەمقورلىق تۋرالى جالعان حابارلاۋ قىلمىستىق جاۋاپتىلىققا اكەپ سوعاتىنىن ەسكە سالامىز. سىبايلاس جەمقورلىقسىز قوعامدى بىرگە قۇرايىق! سىبايلاس جەمقورلىققا قارسى كۇرەسكە قوسىلىڭىز! تەك بىرلەسكەن كۇش-جىگەرمەن ءبىز ادال جانە ءادىل قوعام قۇرا الامىز، - دەپ حابارلادى سىبايلاس جەمقورلىققا قارسى ءىس-قيمىل اگەنتتىگىنەن.
ەسكە سالا كەتەيىك، بۇعان دەيىن انتيكور باسشىسى شەنەۋنىكتەر شەشىمدى قورىقپاي قابىلداۋ قاجەت ەكەنىن ايتقانىن جازعان بولاتىنبىز.
