جەمقورلىق: قازاقستان حالىقارالىق رەيتينگتە قاي ورىندا؟

Transparency International «سىبايلاس جەمقورلىقتى قابىلداۋ يندەكسى» حالىقارالىق رەيتينگىندە 2024-جىلى قازاقستاننىڭ ناتيجەلەرى جاقسارعان.

«ەلىمىز 40 ۇپاي جيناپ، 180 ەل اراسىندا 5 ورىنعا كوتەرىلدى (88-ورىن). بۇل - سىبايلاس جەمقورلىققا قارسى كەشەندى شارالاردىڭ ارقاسىندا قول جەتكىزىلگەن جاڭا تاريحي كورسەتكىش»، - دەپ جازىلعان حابارلامادا.

الەم بويىنشا ورتاشا بال – 43، ال شىعىس ەۋروپا جانە ورتالىق ازيا ايماعىندا (19 ەل) 35 بولدى.

قازاقستان رەيتينگى 2016-جىلدان باستاپ ايتارلىقتاي وسكەن ەل رەتىندە اتاپ ءوتىلدى: 11 بالعا (29 بالدان) وسكەن.

«ورتالىق ازيا ءوڭىرى ەلدەرىنىڭ ىشىندە قازاقستان ەڭ جوعارى پوزيتسيانى يەلەنەدى جانە رەيتينگتى جاقسارتقان جالعىز ەل. يندەكستە قازاقستاننان كەيىن ءۇندىستان (38)، يندونەزيا (37)، ارگەنتينا (37)، سەربيا (35)، ۋكراينا (35)، برازيليا (34)، تايلاند (34)، تۇركيا (34)، بەلارۋس (33)، رەسەي (22) جانە ت. ب. ەلدەر ورنالاسقان»، - دەپ جازىلعان حابارلامادا.

جەمقورلىقتى قابىلداۋ يندەكسى - قازاقستاننىڭ رەيتينگىن شىعارۋ ءۇشىن 9 ءتۇرلى ۇيىمنىڭ دەرەكتەرى پايدالانىلعان كومپوزيتتىك يندەكس. رەيتينگ مەملەكەتتىك سەكتورداعى سىبايلاس جەمقورلىقتى قابىلداۋدىڭ ساراپتامالىق جانە بيزنەس باعالاۋلارىنا نەگىزدەلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى