جەمقورلىق ءىسى: باسقارما باسشىسى ايبول قۇلبايەۆ كۋاگەر رەتىندە جاۋاپ بەرىپ جاتىر
استانا. KAZINFORM - جەمقورلىق ءىسىن تەرگەۋ اياسىندا الماتى وبلىسى دەنە شىنىقتىرۋ جانە سپورت باسقارماسىنىڭ باسشىسى ايبول قۇلبايەۆ كۋاگەر رەتىندە جاۋاپ بەرىپ جاتىر. بۇل تۋرالى ق ر سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى دارحان قۇراقبايەۆ ايتتى.
بۇعان دەيىن كەيبىر بۇقارالىق اقپارات قۇرالدارىندا ا. قۇلبايەۆتىڭ ۇستالعانى تۋرالى حابارلاعان ەدى. الايدا اگەنتتىك باسشىسىنىڭ ورىنباسارى بۇل اقپاراتتى جوققا شىعاردى.
- بىزگە وسى ءىس بويىنشا ءوتىنىش ءتۇستى. نەگىزى، ول سول جەردە باسشى بولعان كەزدەگى ۆەدومستۆوعا قاتىستى ءىس تەرگەلىپ جاتىر. بۇعان دەيىن ونىڭ ۇستالعانى تۋرالى قاۋەسەت تاراپ جاتتى، ءبىراق ءبىز بۇل اقپاراتتى راستامايمىز. ول مەكەمەنىڭ باسقا قىزمەتكەرلەرىمەن بىرگە تەرگەۋ ءىس- قيمىلدارىنا قاتىسىپ ءجۇر. ءبىز سىبايلاس جەمقورلىق ءىسىن تەرگەپ جاتىرمىز. تەرگەۋ ارەكەتتەرىنىڭ قورىتىندىسى بويىنشا شەشىم قابىلدانادى. ول قورعانۋعا قۇقىعى بار كۋاگەر رەتىندە قاتىسىپ ءجۇر، - دەدى د. قۇراقبايەۆ سەناتتا تىلشىلەر سۇراعىنا جاۋاپ بەرە وتىرىپ.
ەسكە سالساق، بيىل اقپان ايىندا الماتى وبلىسى اكىمىنىڭ وكىمىمەن ايبول قۇلبايەۆ الماتى وبلىسى دەنە شىنىقتىرۋ جانە سپورت باسقارماسىنىڭ باسشىسى لاۋازىمىنا تاعايىندالدى.
