جۇكتى ايەلدىڭ جاناشىرى: دوۋلا دەگەن كىم؟
استانا. قازاقپارات - وركەنيەت دامىپ، جاھاندانۋ قانات جايعان سايىن جاڭا ماماندىق پەن جاڭا قىزمەتتىڭ ءتۇر-ءتۇرى پايدا بولىپ جاتىر. سونداي ماماندىقتىڭ ءبىرى - دوۋلا. ەل اۋزىندا «زاماناۋي ەنە» اتانىپ كەتكەن دوۋلالاردىڭ قىزمەتىنە قازىر سۇرانىس ارتىپ كەلەدى.
ابىسىن-اجىن بۇرىنعىداي قاۋىمداسىپ ءومىر سۇرمەيدى، ال ەنەلەر بولسا جۇمىسباستى. جاس بوسانعان ايەلدى 40 كۇن باپتايتىن ەشكىم جوق. ال جاس اناعا كومەك كەرەك. مۇندايدا دوۋلالاردىڭ قىزمەتى تاپتىرماس مۇمكىندىك بولىپ تۇر. Turkystan.kz سايتىنىڭ ءتىلشىسى وسى ءبىر ماماندىقتىڭ قىر-سىرىمەن تانىسۋ ءۇشىن ءبىر جارىم جىلدان بەرى دوۋلا قىزمەتىن كورسەتىپ جۇرگەن باقىتجان ۇستەمىروۆامەن تىلدەسكەن بولاتىن.
«قازىر جاسىم 52 دە. مەديتسينا كوللەدجىنىڭ اكۋشەرلىك فاكۋلتەتىن ءتامامداعانمىن. كوللەدج بىتىرگەن سوڭ ۇزاق جىلدار بويى جاڭا تۋعان سابيلەر پاتولوگياسى بولىمشەسىندە، بالالاردى وڭالتۋ ورتالىعىندا جۇمىس ىستەدىم. سول جەردە ءجۇرىپ كەلىنشەكتەردىڭ بوسانعاندا قالاي قينالاتىنىن، جاساندى تىنىس الۋ اپپاراتىندا جاتقان، دەنساۋلىعىندا كىناراتى بار بالالاردى كوپ كوردىم. مۇنىڭ ءبارىنىڭ سەبەبى نەدە دەپ ويلاناتىنمىن. ءسويتىپ 1,5 جىل بۇرىن رەسمي مەديبيكەلىك جۇمىسىمنان شىعىپ، ءبىرجولا دوۋلا قىزمەتىنە دەن قويدىم. جاڭاعى اۋىتقۋلاردىڭ بارلىق جاۋابىن وسى دوۋلالىقتان تاپتىم»، - دەيدى ول.
«ايەلدىڭ دەنساۋلىعىنا كەرى اسەر ەتەتىن فاكتور كوپ»
قازىر اۋرۋشاڭ بالا كوپ. ءتۇرلى دەرت، ءتۇرلى دياگنوز بار. مامان مۇنىڭ سەبەبىن دە ءتۇسىندىردى.
«بۇرىنعى ايەلدەر نەگە شىدامدى بولعان؟ نەگە دەنى ساۋ بالالاردى كوپ تۋعان؟» دەپ سۇرايدى. سەبەبى ول كەزدە ءبارى تابيعي بولدى. تاماقتىڭ ءوزى ماۋسىمعا ساي بولدى. ءبىزدىڭ اتا-انالارىمىز تابيعاتپەن ۇيلەسىمدە ءومىر ءسۇردى. تاڭدا تۇردى، كۇن باتقاندا جاتتى. ال قازىر بۇل تابيعي ءريتمنىڭ ءبارى جوق. قازىرگى الەم كۇيزەلىسكە تولى، كوز ىلەسپەس جىلدامدىقپەن دامىپ جاتىر. وسى وزگەرىستىڭ بارىنە ىلەسەمىز دەپ كۇيزەلىسكە تۇسەمىز. ءبىز بۇگىن سيۆيليزاتسيانىڭ «قۇنىن» تولەپ جاتىرمىز. ەكولوگيا ناشار، از قوزعالامىز. گادجەتتەر، كومپيۋتەر، ۇشاق، جۇردەك پويىزدار بار. تاماق دۇرىس ەمەس. سينتەتيكا، فاستفۋد كوپ. تابيعي ونىمدەر از. وسىنىڭ ءبارى ايەلدىڭ دەنساۋلىعىنا اسەر ەتپەي قويمايدى»، - دەيدى باقىتجان حابيلۋللا قىزى.
«تاجىريبەمدەگى ەڭ ۇزاق تولعاق 18 ساعاتقا سوزىلدى»
دوۋلانىڭ قىزمەتىنە جۇكتىلىك باستالعان كەزدەن-اق جۇگىنۋگە بولادى. ول كەزدە دوۋلا جان-جاقتى كەڭەس بەرىپ، ايەلدى پسيحولوگيالىق تۇرعىدان دايىندايدى. ەگەر جۇكتىلىك كەزەڭىنە دوۋلا قاجەت بولماسا، وندا بوسانۋ جانە بوسانعاننان كەيىنگى كەزەڭگە كەلىسىمشارت جاساي الاسىز.
«ايەلدەر جۇكتىلىككە جان-جاقتى: فيزيكالىق، پسيحولوگيالىق، ەموتسيونالدىق جاعىنان دايىندالۋى كەرەك. نۋتريتسيولوگ، ناتۋروپات سياقتى مامانداردىڭ بارىنە بارعان دۇرىس. جۇكتى كەزدە ايەل وسىلاي جۇمىس ىستەسە قانشاما اۋرۋ مەن اۋىتقۋدىڭ الدىن الادى. دوۋلا بولىپ ءجۇرىپ، ايەلدەرگە بوسانۋ قيىن ەكەنىن بايقادىم. دەنەسىندە سپازما بار. سپازما دەگەن كۇيزەلىس. ونى كەتىرۋ ءۇشىن يوگا، ءجۇزۋ سياقتى سپورتپەن اينالىسۋ كەرەك. دوۋلا قىزمەتىنە نەعۇرلىم ەرتەرەك جۇگىنسە سوعۇرلىم جاقسى. ەرتەرەك اقىل-كەڭەس، نۇسقاۋ بەرەمىز. كەي كەلىنشەكتەردە قورقىنىش بولادى. بىلمەگەنىن ءتۇسىندىرىپ، تىنىشتاندىرامىن. اسىرەسە ءبىرىنشى رەت بوسانىپ تۇرعان جاس كەلىنشەكتەردىڭ قورقىنىشى باسىم، تولعاعى ۇزاق بولادى. ءوز تاجىريبەمدەگى ەڭ ۇزاق تولعاق 18 ساعاتقا سوزىلدى. 18 ساعات بويى پەرزەنتحانادا، سول كەلىنشەكتىڭ قاسىندا بولدىم. تولعاق بۇل - ءبىر ۋاقىتتا 20 سۇيەكتىڭ سىنعانىنداي اۋىراتىن نارسە. مۇندايدا تولعاقتى جەڭىلدەتۋ ءۇشىن ءتۇرلى امالدى قولدانامىز. ءتۇرلى ماسساج جاساپ، اروما، جاكۋزي قولدانامىز، دۋش استىندا وتىرعىزامىز. مۇنىڭ ءبارى ايەلدىڭ كوڭىلىن ءبولىپ، اۋىرسىنۋدى باسادى. قاجەت مۋزىكالاردى قوسامىن. دۇرىس تىنىس الۋدى ۇيرەتەمىن. بوسانعاننان كەيىن پالاتادا ەكى ساعات بىرگە بولامىن. تاماق ىشۋىنە، بالانى وراۋعا، ەمىزۋىنە كومەكتەسەمىن، شاي بەرىپ، شۇلىعىن كيىزەمىن. ءوزىم كەيدە پەرزەنتحاناعا تاماق الا بارامىن. سەبەبى بوسانعان كەلىنشەكتەردىڭ قارنى اشادى. پەرزەنتحانادان شىققاننان كەيىن ۇيىنە بارىپ كومەكتەسەمىن. بالانى قۇنداقتاۋدى ۇيرەتەمىن، تاماعىن ىستەيمىن. مۇنىڭ ءبارى ەندى كەلىسكەنىڭمىزگە، قانداي قىزمەت پاكەتىن العانىنا بايلانىستى»، - دەيدى مامان.
«ءار ايەل ءۇشىن الاڭدايمىن»
دوۋلا قىزمەتىنىڭ قۇنى 50 مىڭ-500 مىڭ ارالىعىندا ەكەن. ءار دوۋلانىڭ كورسەتەتىن قىزمەتى ءارتۇرلى. ارالارىندا پسيحولوگ قىزمەتىن كورسەتەتىندەرى دە بار. قازىر دوۋلا ماماندارىن دايارلايتىن ورتالىقتار كوبەيگەن. ارنايى وقۋىن وقىعان ادام عانا دوۋلا بولا الادى.
«ايىنا ەكى-ءۇش ايەلمەن جۇمىس ىستەيمىن. ءبىرى ايدىڭ باسىندا، ءبىرى ورتاسىندا، ءبىرى سوڭىندا تۇسەتىندەي ەتىپ «الامىن». كەيدە ۋاقىتىنان بۇرىن نەمەسە كەش تۋىپ قالاتىندار دا بولادى. كەيدە تەگىن دە قىزمەت كورسەتەمىن. ماتەريالدىق جاعدايى جوق ەكەنىن، جالعىز قالعانىن كورسەم تەگىن كومەكتەسەمىن. ءار ايەل ءۇشىن الاڭدايمىن. ءار بوسانۋ پروتسەسى وزىنشە قىزىق. قايتالانبايدى. ءار جۇپ ەسىمدە. دوۋلا بولۋ ءۇشىن كوپ كۇش-قۋات كەرەك. بوسانعاننان كەيىن ءوزىڭ دە ەكى-ءۇش كۇن قالپىڭا كەلەسىڭ. ۇنەمى ءبىلىم جەتىلدىرىپ وتىرۋىڭ قاجەت. جىلىنا ءۇش-ءتورت وقۋدان وتەمىن. دەگەنمەن ومىرگە ءبىر ءسابي كەلگەنىن، جاڭا ادامعا ءومىر سىيلاعانىم ەسىمە تۇسسە شارشاعانىمدى ۇمىتىپ كەتەمىن»، - دەيدى ول.
