جۇكتى ايەلدەردى جۇمىستان شىعارۋعا تىيىم سالىندى
تاشكەنت. KAZINFORM - وزبەكستاننىڭ ەڭبەك كودەكسىنە ءبىرقاتار وزگەرىس ەنگىزىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
كودەكستىڭ جاڭا رەداكسياسىنا ساي، ەندى جۇمىس بەرۋشىلەر جۇكتىلىككە جانە بالا تۋۋعا بايلانىستى ايەلدەردى جۇمىستان شىعارا المايدى.
ايتا كەتەيىك، قۇجاتتىڭ بۇعان دەيىنگى نۇسقاسىندا وسىعان ۇقساس جاعدايلارعا قاتىستى تەك شەكتەۋلەر بولاتىن. ياعني، جۇمىس بەرۋشىگە جۇكتى ايەلدەردى مۇمكىندىگىنشە قىزمەتتەن بوساتپاۋ جانە ولاردى باسقا جۇمىسقا اۋىستىرماۋ ۇسىنىلاتىن.
سونىمەن قاتار ەندى وزبەكستاندىقتارعا ەڭبەك شارتىن ەلەكتروندىق فورماتتا راسىمدەۋ مۇمكىندىگى بەرىلەدى. ول ءۇشىن «ءبىرىڭعاي ۇلتتىق ەڭبەك جۇيەسىنىڭ» پلاتفورماسى قولدانىلادى.
ەسكە سالايىق، بيىل وزبەكستان ۇكىمەتى 5,2 ميلليون ادامعا جۇمىس ۇسىنىپ، كەدەيلىك شەگىندە ءومىر ءسۇرىپ جاتقان 1,5 ميلليون تۇرعىننىڭ جاعدايىن جاقسارتۋعا باعىتتالعان شارالاردى قابىلداماق.
بۇعان دەيىن حابارلاعانىمىزداي، وزبەكستاندا 500 ايەلدى اۆتوبۋس جۇرگىزۋشىسى ماماندىعىنا وقىتۋ جوسپارلانىپ وتىر.
