جۇك جەتكىزۋ مەرزىمى قىسقارادى: الماتىدا جاڭا تەمىرجول قۇرىلىسى باستالدى

مەملەكەت باسشىسىنىڭ تاپسىرماسى بويىنشا ەلدىڭ كولىك-ترانزيتتىك الەۋەتىن دامىتۋدا ماڭىزى زور ينفراقۇرىلىمدىق جوبا ىسكە اسىرىلىپ وتىر. ق ر پرەمەر-ءمينيسترى ءاليحان سمايىلوۆ تەمىرجول جەلىسىنىڭ العاشقى بۋىنىن توسەۋ راسىمىنە قاتىستى.

2022-جىلى قازاقستان مەن قىتاي اراسىنداعى تەمىرجول جۇك تاسىمالى 23 ميلليون توننادان ارتىپ، تاريحي ماكسيمۋمنان استى. 2023-جىلدىڭ باسىنان بەرى اتالعان كورسەتكىش تاعى 22 پايىزعا ءوستى. مۇنداي جاعدايدا نەگىزگى حالىقارالىق باعىتتاردىڭ قيىلىسىندا ورنالاسقان الماتى تەمىرجول تورابىنا جۇكتەمە ارتىپ وتىر.

سونىمەن قاتار جوبانى ىسكە اسىرۋ الماتى ستانساسىن اينالىپ وتەتىن جەتىگەن - قازىبەك بەك جاڭا تەمىرجولىنا جۇك اعىنىن قايتا باعىتتاۋعا مۇمكىندىك بەرەدى. جالپى، جاڭا جەلى الماتى تورابىنداعى جۇكتەمەنى 40 پايىزعا ازايتىپ، جۇك جەتكىزۋ ۋاقىتىن ەداۋىر قىسقارتادى.

ءاليحان سمايىلوۆ «التىنكول-قورعاس» شەكارالىق وتكەلى ارقىلى وتەتىن تەمىرجول باعىتى سوڭعى جىلدارى قارقىندى ءوسىم كورسەتكەنىن اتاپ ءوتتى.

«اتالعان ترانزيتتىك دالىزدە الماتى تەمىرجول تورابى شۋ، اقتوعاي، التىنكول جانە الماتى-2 باعىتتارى بويىنشا پويىزداردىڭ قوزعالىسىن قامتاماسىز ەتەدى. جوبانى ىسكە اسىرۋ جۇكتەردى جەتكىزۋ مەرزىمىن 2 ەسەگە قىسقارتادى»، - دەدى پرەمەر-مينيستر.

ول سونداي-اق، جوبانى جۇزەگە اسىرۋ بارىسىندا قازاقستاننىڭ ۇلەسى كەمىندە 85 پايىز بولاتىنىن ايتتى. قۇرىلىس كەزىندە 1400 ادام جۇمىسپەن قامتىلىپ، جەلى ىسكە قوسىلعاندا شامامەن 500 ادامعا تۇراقتى جۇمىس ورنى اشىلادى.

«شپال، رەلستەر مەن ترانسفورماتورلار شىعارۋدى، ينەرتتى ماتەريالدار، قۇم جانە قيىرشىق تاستاردى جەتكىزۋدى جەرگىلىكتى كومپانيالار جۇزەگە اسىرادى»، - دەدى ءاليحان سمايىلوۆ.

جالپى قۇرىلىس پروتسەسىندە 130 كيلومەتر تەمىرجول، 3 ستانسا، 13 كوپىر، 5 ت/ج جانە 1 اۆتوكولىك وتكەلى سالىنادى.

رەسمي ءىس-شارادا قۇرمەتتى تەمىرجولشى، ەڭبەك ارداگەرى قالتاي سامبەتوۆ ءسوز سويلەدى.

«جەتىگەن - قازىبەك بەك بەكەتتەرىنىڭ اراسىندا تەمىرجولشىلار كوپتەن كۇتكەن جول قۇرىلىسى باستالدى. بۇل جولدىڭ ماڭىزى زور، ويتكەنى ول ەل ەكونوميكاسىنىڭ دامۋىنا، ءوسىپ-وركەندەۋىنە ىقپال ەتەدى. اتالعان تەمىرجول باعىتى قازاقستان مەن قىتاي، ورتالىق ازيا مەن رەسەي اراسىنداعى ترانزيتتىك مۇمكىندىكتەردى ەداۋىر ارتتىرادى»، - دەدى ول.

وتاندىق ءونىمنىڭ ۇزدىكسىز ەكسپورتىن قامتاماسىز ەتۋ جانە جۇك ترانزيتىن كەڭەيتۋ ماقساتىندا قازاقستاندا تەمىرجول ينفراقۇرىلىمىن دامىتۋ بويىنشا بەلسەندى جۇمىس جالعاسىپ جاتقانىن ايتا كەتكەن ءجون. وسىلايشا، وتكىزۋ قابىلەتىن ارتتىرۋ ءۇشىن دوستىق - مويىنتى ۋچاسكەسىندە ەكىنشى جولدار سالىنۋدا. جاقىن ارادا قىتايمەن ءۇشىنشى حالىقارالىق ءتۇيىسۋ نۇكتەسىنە شىعاتىن داربازا - ماقتاارال جانە باقتى - اياگوز تەمىر جول جەلىلەرىنىڭ قۇرىلىسىن باستاۋ جوسپارلانىپ وتىر. ءۇش جىل ىشىندە بارلىعى 1300 شاقىرىمنان استام تەمىرجول سالىنادى.

«بۇگىن ءبىز الماتى تورابىن اينالىپ وتەتىن تەمىرجول جەلىسىنىڭ قۇرىلىسىن باستايمىز. ول ورتالىق ازياعا، ەۋروپاعا جانە كاسپيي تەڭىزى پورتتارىنا باعىتتالعان ترانزيتتىك جۇكتەردىڭ ءوتۋىن جىلدامداتادى. بۇل جەلى سوڭعى ۋاقىتتا قارقىندى دامىپ كەلە جاتقان الماتى تورابىن جەڭىلدەتۋ ءۇشىن وتە قاجەت. اسىرەسە، الماتىنىڭ ماڭى. ونەركاسىپ دامىپ كەلەدى. وتكىزۋ قابىلەتىن قاجەت ەتەتىن كولىك-لوگيستيكالىق ورتالىقتار سالىنۋدا»، - دەدى «ق ت ج» ۇ ك» ا ق باسقارما ءتوراعاسىنىڭ ورىنباسارى قانات الماعامبەتوۆ.

ونىڭ ايتۋىنشا، بۇگىن الماتى تورابىنا كەلەتىن جۇك 1,5-2 تاۋلىككە كەشىگىپ جاتىر. الايدا، جاڭا تەمىرجول جەلىسىنىڭ ارقاسىندا توراپتىڭ جۇمىسى ايتارلىقتاي جاقسارادى.

«مەنىڭ ويىمشا، مۇندا قىزمەت كورسەتىلەتىن بارلىق جۇك جونەلتۋشىلەر مەن جۇك الۋشىلار مۇنى بىردەن سەزىنەدى. بۇل جۇمىس ەلىمىزدىڭ كولىك- لوگيستيكالىق مۇمكىندىكتەرىن دامىتۋعا قاتىستى پرەزيدەنتتىڭ جولداۋىن ىسكە اسىرۋ شەڭبەرىندە جۇرگىزىلىپ وتىر. بۇگىندە رەسپۋبليكادا جۇكتەردى جەدەل وتكىزۋ ءۇشىن شىن مانىندە قولايلى جاعدايلار جاسالۋدا»، - دەپ اتاپ ءوتتى قانات الماعامبەتوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى