جازۋشى-ەتنوگراف بولات بوپاي ۇلى ومىردەن ءوتتى

بۇل تۋرالى الەۋمەتتىك جەلىدە بەلگىلى جۋرناليست ءبىلال قۋانىش حابارلادى.

بولات بوپاي ۇلى 1960 -جىلى 1-قاڭتار كۇنى ق ح ر شينجاڭ ولكەسى، التاي ايماعىندا دۇنيەگە كەلگەن. ءار جىلدارى قازاق راديوسىندا، قازاقستان تەلەارناسىندا رەداكتور، سەناريست قىزمەتىن اتقارعان. قازاق ەتنوگرافياسى تاقىرىبىندا 30 دان استام كىتاپ جازعان. ق ر «مادەنيەت ۇزدىگى» ءتوس بەلگىسىنىڭ يەگەرى، قازاقستان رەسپۋبليكاسىنىڭ قۇرمەتتى ازاماتى.

بولات بوپاي ۇلى 1960 -جىلى ق ح ر شينجاڭ ولكەسى، التاي ايماعى، كوكتوعاي اۋدانى، قۋەرتىس قالاسىندا دۇنيەگە كەلگەن.

1967-1977 -جىلدارى كوكتوعاي اۋدانىندا قازاق تىلىندە باستاۋىش، ورتاۋ جانە ورتا مەكتەپتەردە وقىدى.

1978 -1981 -جىلدارى شينجاڭ «دەنە تاربيە ساڭلاعى» جۋرنالىندا جاۋاپتى رەداكتور بولىپ قىزمەت اتقاردى.

1982-1986 -جىلدارى كۇيتىن قالاسىنداعى ىلە پەداگوگيكالىق ينستيتۋتىنىڭ قازاق ءتىلى مەن ادەبيەتى فاكۋلتەتىندە وقىپ، ءبىلىم تولىقتىردى.

1986-1992 -جىلدارى ءۇرىمجى قالالىق 36-ورتا مەكتەپتە قازاق ءتىلى مەن ادەيەتىنەن ساباق بەرىپ، وقىتۋشىلىق مىندەت اتقاردى. ادەبيەت ءبولىمىنىڭ مەڭگەرۋشىلىك مىندەتىن قوسا وتەدى.

1993-1994 -جىلدارى شىنجاڭ جاستار-ورەندەر باسپاسىندا قازاق رەداكسياسىنىڭ ءبولىم مەڭگەرۋشىسى «عىلىم بۇلاعى» جۋرنالىنىڭ جاۋاپتى رەداكتورى بولدى.

1995-1998 -جىلدارى ق ر الماتى قالاسىنداعى قاز م ۋ-دىڭ قازاق ادەبيەتى مەن تەورياسى فاكۋلتەتىندە اسپيرانت بولىپ وقىدى.

1999-2004 -جىلدىرى قازاق راديوسى شالقار باعدارلاماسىندا رەداكتورلىق مىندەت وتەدى.

2005-2012 -جىلعا دەيىن جەكە شىعارماشىلىقپەن شۇعىلداندى.

2013-2018 -جىلدارى قازاقستان تەلەارناسىنىڭ «ايتۋعا وڭاي» توك شوۋىنىڭ باس كەڭەسشىلىك مىندەتىن اتقارا ءجۇرىپ، سەناريىن جازدى.

2019-2020 -جىلدارى الماتى قالالىق 107-ليسەي دە قازاق ادەبيەتىنەن ساباق بەردى.

بولات بوپاي ۇلى 11 جاسىندا قولىنا قالام الىپ شىعارمالار جازا باستادى. ونىڭ ەڭ العاشقى تىرناق الدى تۋىندىسى شاعىن ولەڭمەن باستالدى.

1977 -جىلى 10-كلاس ءبىتىرىپ كەتىپ بارا جاتقانداعى «ارمانىم بار» ولەڭى التاي گازەتىندە جارىق كورگەن. سودان باستاۋ العان شىعارماشىلىق جول تارىدايدان تاۋدايعا قاراي ۇلعايا بەردى...

بولات بوپاي ۇلى ءۇرىمجى قالاسىندا وقىتۋشى بولا ءجۇرىپ، قازاق ءتىلى مەن ادەبيەتىنەن 30 دانا اۆتورلىق قۇقىعى بار، باستاۋىش، ورتالاۋ، ورتا مەكتەپتەرگە جانە جوعارى وقۋ ورىندارىنا ارنالعان «قازاق ءتىلى مەن ادەبيەتى»، «ادەبيەت وقۋلىعى»، «قازاق ءتىلى وقۋلىعى»، «وقۋلىقتارعا تالداۋ»، «ءسوز سارالاۋ ونەرى»، «ادەبيەتتەن ءجۇز كۇندىك»، ت. ب.

بولات بوپاي ۇلى كەيىنگى وتىز جىلدا قازاقتىڭ ەتنوگرافيالىق تاقىربىن تەرەڭ قاۋزاپ 30 دان استام كىتاپ جازدى. «قازاق كادەسى»، «قازاق مىنەزى»، «قازاق تانىعان گۇلدەر»، «قازاق اسپان ەسەبى»، «قازاق ءتۇس جورۋى»، «قازاق ناۋرىزناماسى»، «سالت-ءداستۇر سويلەيدى»، «باستاۋدان باقيعا دەيىن»، «قازاقتىڭ العىستارى مەن قارعىستارى»، «اقىت اقيقاتى»، «جازۋ شەبەرلىگى»، « شەتەلدەگى قازاق تۇلعالارى»، «ءسوز سارالاۋ ونەرى»، «الديدەن ەپوسقا دەيىن»، «قازاقتىڭ ولشەم- مولشەر سوزدەرى»، «قازاق جوقتاۋ جىرلارى»، ت. ب.

بولات بوپاي ۇلى ەلگە ورالعان 30 جىلدا مەكتەپتەر، كوللەجدەر، ۋنيۆەرسيتەتتەر دە قازاق سالت-ءداستۇر تاقىرىبىندا 2150 ساعاتتان ارتىق لەكسيا وتكىزگەن. قازاقستاندا شىعاتىن گازەت-جۋرنالداردا، بارلىق سايتتاردا قازاق ەتنوگرافيالياق تاقىرىبىندا جازعان مىڭعا جۋىق عىلىمي ماقالالارى جارىق كورگەن.

بولات بوپاي ۇلى قازاقستان جازۋشىلار وداعىنىڭ، قازاقستان جۋرناليستەر وداعىنىڭ مۇشەسى، قازاق ۇلتتىق سالت-ءداستۇر، ادەت-عۇرىپ اكادەمياسىنىڭ اكادەميگى. تانىمال ەتنوگراف جازۋشى، استرولوگ، گۇل تانۋشى عالىم، ادەبيەت سىنشىسى. نازارياشى، اعارتۋشى، ۇلاعاتتى ۇستاز. قوعام قايراتكەرى، ق ر «مادەنيەت ۇزدىگى ءتوس بەلگىسىنىڭ» يەگەرى، ق ر قۇرمەتتى ازاماتى.

«قازاق حالىقارالىق تۋريستىك كەشەنى» جوباسىنىڭ پاتەنت يەسى، «قازاق كيىز ءۇيى - عالام مودەلى» كىتابىنىڭ اۆتورى.

وسىعان دەيىن بولات بوپاي ۇلىنىڭ Kazinform تىلشىسىمەن بولعان قازاقتىڭ ءتول جاڭا جىلى، سالت-ءداستۇرى، ىرىم- تىيىمدارى تۋرالى سۇحباتىن جاريالاعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى