جازدا «بۋراباي» ۇلتتىق پاركىنە جارتى ميلليونعا جۋىق ادام كەلدى
استانا. قازاقپارات - 1-ماۋسىم مەن 31-تامىز ارالىعىندا بۋرابايعا 450 مىڭنان استام ادام كەلدى. بۇل وتكەن جىلمەن سالىستىرعاندا 20 مىڭعا ارتىق.
«بۋراباي» مەملەكەتتىك ۇلتتىق پاركى ديرەكسياسىنىڭ مالىمەتىنشە، جىل باسىنان بەرى 8 ايدا ۇلتتىق پارك 650 مىڭنان استام قوناقتى قابىلدادى. 2023 -جىلدىڭ 8 ايىنداعى كورسەتكىش - 550,7 مىڭ ادام.
بۋراباي ەلدىك جانە حالىقارالىق دەڭگەيدەگى سپورتتىق ءىس-شارالار وتەتىن ورىنعا اينالىپ كەلەدى. بۇل تۋريستەردى تارتۋعا جانە بۋرابايدىڭ تانىمالدىعىن ارتتىرۋعا ىقپال ەتەدى. «X- Waters Kazakhstan 2024» ،«Aqbura Bay trail 2024» سىندى سپورتتىق ءىس-شارالارعا مىڭداعان ادام كەلگەنى وسىنى كورسەتەدى.
«ينفراقۇرىلىمدى دامىتۋ جانە ەكسكۋرسيالىق باعدارلامالاردى كەڭەيتۋ قازاقستاننان عانا ەمەس، شەتەلدەن دە دەمالۋشىلاردى تارتادى. جازدا ساياباققا 8 مىڭنان استام شەتەلدىك تۋريست كەلدى. قوناقتاردىڭ گەوگرافياسى بويىنشا توپ-5 ەل قاتارىندا رەسەي، وزبەكستان، تۇرىكمەنستان، گەرمانيا جانە قىتاي بار. ا ق ش ازاماتتارى قىزىعۋشىلىق تانىتىپ وتىر»، - دەدى «بۋراباي» م ۇ ت پ ديرەكتورىنىڭ دامۋ جونىندەگى ورىنباسارى ۆەنەرا نۇعىمانوۆا.
ساياباق ەكولوگيالىق تۋريزمدى دامىتۋعا ەرەكشە نازار اۋدارا وتىرىپ، جايلى دەمالۋ ءۇشىن جاعداي جاساپ جاتىر. ايماقتىڭ تابيعاتىمەن جاقىنىراق تانىسۋعا كومەكتەسەتىن ەكولوگيالىق سوقپاقتار مەن تۋريستىك مارشرۋتتار ارقىلى وسى جازدا 9 مىڭنان استام ادامدى ءجۇرىپ ءوتتى.
جازعى ماۋسىمنىڭ قورىتىندىسى «بۋراباي» ۇلتتىق پاركىنىڭ قازاقستانداعى ىشكى تۋريزمنىڭ جەتەكشى باعىتتارىنىڭ ءبىرى رەتىندەگى پوزيتسياسى نىعايا تۇسكەنىن كورسەتىپ وتىر.
اۆتور
ەلميرا ورالبايەۆا
