جايىق وزەنىندەگى مول سۋ سوكولوگ كانالىمەن كاسپي تەڭىزىنە قۇيىلادى

جايىق وزەنىنە مول سۋ ءالى كەلىپ جاتىر. سوعان بايلانىستى اتىراۋ قالاسى مەن وعان ىرگەلەس ورنالاسقان ەلدى مەكەندەردى تاسقىن سۋدان قورعاۋ ءۇشىن ەكى كانالعا ماڭىز بەرىلدى.

سونىڭ ءبىرى - سوكولوك كانالى. اتىراۋ وبلىسى اكىمىنىڭ تاپسىرماسىمەن جايىق وزەنىنىڭ سۋىن وسى كانال ارقىلى كاسپي تەڭىزىنە بۇرۋ جوسپارلاندى.

بۇل كانالدىڭ نەگىزگى ۇزىندىعى - 32 شاقىرىم. كانالدىڭ تابانىن تازالاۋ، جاعالاۋىن بەكىتۋ جۇمىستارىنىڭ ۇيلەستىرۋشىسى ولجاس سۇلتانوۆتىڭ مالىمەتىنە سۇيەنسەك، سوكولوكتىڭ سۋ وتكىزۋ قۋاتى سەكۋندىنا 100 تەكشە مەتردى قۇرايدى.

«سۋ تاسقىنىنا دايىندىق كەزىندە جايىق وزەنىنەن باستاۋ الاتىن كانالدارعا ماڭىز بەرىلدى. اسىرەسە، اتىراۋ قالاسىنا قاراي اعاتىن مول سۋدى ازايتۋ ءۇشىن سوكولوك كانالىنىڭ مۇمكىندىگىن پايدالانۋ كوزدەلدى. ويتكەنى، بۇل كانال مۇنايلى شاھاردى اينالىپ ءوتىپ، جايىق وزەنى مەن كاسپي تەڭىزىنىڭ ارالىعىن جالعاستىرادى. بۇل - سوكولوگ كانالىنىڭ باستى ەرەكشەلىگى. باستاپقى جوسپارعا سايكەس قولدانىستاعى كانالدىڭ جاعالاۋىن بەكىتۋ قولعا الىندى. كەيىن جاعدايدى جەتە زەردەلەپ، ەسكىسىنىڭ جانىنان جاڭا كانال قازۋ تۋرالى شەشىم قابىلداندى. سەبەبى ەسكى كانالدىڭ كوپ جەرى باتپاق، تەحنيكانىڭ جۇمىسىنا قيىندىق كەلتىردى»، - دەيدى ولجاس سۇلتانوۆ.

ونىڭ ايتۋىنشا، جاڭا كانالدىڭ جاعالاۋىنا بارلىق ستاندارتقا سايكەس نىعىزدالعان بوگەت تۇرعىزىلدى. بوگەتتىڭ بيىكتىگى - بالتىق مەجەسى بويىنشا 21 مەتر. ال ەڭىس تۇستاردىڭ بارىنە گەودەزيالىق ولشەم جۇرگىزىلىپ، ارنايى بەلگىمەن رەتتەلگەن.

اتىراۋ وبلىسى جەدەل شتابىنىڭ اقپاراتىنا قاراعاندا، سوكولوك كانالىنىڭ بويىندا تاۋلىكتىك كەزەكشىلىك قويىلعان. وتكەن اپتادا جاۋعان جاڭبىردان كەيىن ءۇش ۋچاسكەدە بوگەتتى نىعايتۋ جۇمىسى جۇرگىزىلدى. وعان 47 ادام، 36 تەحنيكا تارتىلدى.

اۆتور

جولداسبەك شوپەعۇل

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى