جايىق وزەنىنە مول سۋ كەلسە، بالىق قورىنىڭ كوبەيۋىنە ىقپال ەتەدى
اتىراۋ. KAZINFORM - جايىق وزەنىنە مول سۋ كەلسە، بالىق قورىنىڭ كوبەيۋىنە ىقپال ەتەدى.
«بالىق شارۋاشىلىعى عىلىمي-زەرتتەۋ ينستيتۋتى» ج ش س اتىراۋ فيليالىنىڭ ديرەكتورى ەربولات قاديموۆتىڭ ايتۋىنشا، سوڭعى ءۇش جىلدا جايىق وزەنىندەگى سۋ دەڭگەيىنە ۇدايى زەرتتەۋ جۇرگىزىلگەن.
«زەرتتەۋ ناتيجەسىندە 2019-2022-جىلدارى جايىق وزەنىنىڭ اتىراۋ قالاسى اۋماعىنداعى بولىگىندە سۋ دەڭگەيىنىڭ وتە تومەن بولعانى انىقتالدى. بۇل جايت بالىق قورىنىڭ كوبەيۋىنە كەرى اسەرىن تيگىزدى. بالىق شارۋاشىلىعى سالاسىن دامىتۋعا سۋ ايدىندارىنداعى احۋالدىڭ سەپتىگى بار. سول سەبەپتەن، بيىل جايىق وزەنىنە مول سۋ كەلسە، بالىق پوپۋلياتسياسىنا، ۋىلدىرىق شاشۋ ۇردىسىنە وڭ اسەر ەتەدى دەپ ەسەپتەيمىز»، - دەيدى ەربولات قاديموۆ.
ونىڭ پىكىرىنشە، سۋ ايدىنىندا اعىس ۇلعايعان سايىن بالىق قورى مولايا تۇسەدى. سونداي-اق، رۇحسات ەتىلگەن مەرزىمدە اۋلاناتىن بالىق تا كوبەيەدى.
ەسكە سالا كەتەلىك، بۇعان دەيىن اتىراۋعا تاسقىن سۋدىڭ كوپ بولىگى مامىر ايىنىڭ باسىندا كەلۋى مۇمكىن ەكەنىن حابارلاعان بولاتىنبىز.
