جايىق پەن ەسىلدە سۋ دەڭگەيى كوتەرىلدى
استانا. KAZINFORM - باتىس قازاقستان جانە سولتۇستىك قازاقستان وڭىرلەرىنە كومەككە بارعان توتەنشە جاعداي، قورعانىس جانە ىشكى ىستەر مينيسترلىكتەرىنىڭ كۇشتەرى مەن قۇرالدارى تۇراقتى ورنالاسۋ ورىندارىنا قايتارىلۋدا.
بۇل تۋرالى توتەنشە جاعدايلار مينيسترلىگىنىڭ وكىلى اسقار ءشارىپ ايتتى.
«جايىق جانە ەسىل وزەندەرىنە سۋدىڭ كەلۋىنە بايلانىستى اتىراۋ، باتىس جانە سولتۇستىك قازاقستان وبلىستارى باقىلاۋدا. سۋ دەڭگەيىنىڭ كوتەرىلۋى بايقالادى، مونيتورينگ جالعاسۋدا»، - دەدى ا. ءشارىپ ورتالىق كوممۋنيكاتسيالار قىزمەتىندە.
جايىق وزەنى بويىندا سۋ تاسقىنىن بولدىرماۋ ماقساتىندا اتىراۋ قالاسىندا، يندەر جانە ماحامبەت اۋداندارىنداعى اۋىلدىق وكرۋگتەردە بوگەتتەردى نىعايتۋ جۇمىستارى جالعاسۋدا.
بۇعان دەيىن بروننان شىعارىلعان جىلجىمالى سورعى ستانتسيالارىن قولدانۋ ارقىلى سۋ باسقان اۋماقتاردان سۋ سورۋ جۇمىستارى جۇرگىزىلۋدە.
اۆاريالىق-قۇتقارۋ جانە سۋ تاسقىنىنا قارسى جۇمىستارعا 25 مىڭنان استام ادام، 3 مىڭ تەحنيكا، 633 سۋ سورۋ قۇرالى، 268 ءجۇزۋ قۇرالى، 14 اۋە كەمەسى جۇمىلدىرىلدى.
