«جايلى مەكتەپ» ۇلتتىق جوباسىنا وتاندىق جيھاز بەن ارلەۋ ماتەريالدارى ساتىپ الىنادى
قازاقستان ۇكىمەتى «جايلى مەكتەپ» ۇلتتىق جوباسىنا وتاندىق جيھاز جانە ارلەۋ ماتەريالدارىن وندىرۋشىلەردىڭ قاتىسۋىن ارتتىرۋدى كوزدەيتىن وزگەرىستەر مەن تولىقتىرۋلار ەنگىزدى، دەپ حابارلايدى Kazinform ۇكىمەتتىڭ باسپا ءسوز قىزمەتىنە سىلتەمە جاساپ.
اتاپ ايتقاندا، جاڭا فورماتتاعى مەكتەپتەر قۇرىلىسى كەزىندە بارلىق جيھاز قازاقستاندىق تاۋار وندىرۋشىلەردەن ساتىپ الىنادى. سونداي- اق سىرتقى قاسبەتتەردى ارلەۋدە قولدانىلاتىن ماتەريالداردىڭ باسىم بولىگى وتاندىق ءوندىرىستىڭ تاۋارلارى بولماق.
كاسىپكەرلەردى قولداۋدىڭ قوسىمشا شاراسى رەتىندە ۇزاق مەرزىمدى جەتكىزۋدى جوسپارلاۋعا جانە ءتيىمدى شارتتارمەن جوبانى قارجىلاندىرۋعا مۇمكىندىك بەرەتىن الدىن الا كەلىسىمشارتتاردى قولدانۋ قاراستىرىلعان.
«جايلى مەكتەپ» ۇلتتىق جوباسىنا وتاندىق جيھاز بەن ارلەۋ ماتەريالدارى ساتىپ الىنادى
ايتا كەتەيىك، وقۋ- اعارتۋ مينيسترلىگى جەرگىلىكتى اتقارۋشى ورگاندارمەن بىرلەسىپ، سالىنىپ جاتقان مەكتەپتەردى جابدىقتاۋ ءۇشىن جيھازدار مەن قۇرال- جابدىقتارعا قاجەتتى بارلىق تەحنيكالىق شارتتاردى انىقتاعان. ق ر ۇكىمەتى قابىلداعان وزگەرىستەردى ساپالى ىسكە اسىرۋ ءۇشىن ەلىشىلىك قۇندىلىق ۇلەسىنىڭ كورسەتكىشتەرىنە مونيتورينگ جۇرگىزىلەدى.
بۇدان بولەك، قوعامدىق مونيتورينگ جۇرگىزۋ ءۇشىن اقپاراتتىق جۇيە ازىرلەنۋدە. وسىلايشا، ءاربىر تۇرعىن مەكتەپ قۇرىلىسىنىڭ بارىسىن قوعامدىق داشبورد ارقىلى باقىلاۋعا مۇمكىندىك الادى. وسى ماقساتتا قازىر ءاربىر وبەكتىدە بەينەباقىلاۋ كامەرالارى ورناتىلىپ جاتىر.
ەسكە سالا كەتەيىك، «جايلى مەكتەپ» ۇلتتىق جوباسى مەملەكەت باسشىسى قاسىم- جومارت توقايەۆتىڭ تاپسىرماسىمەن جۇزەگە اسىرىلۋدا. جوبا اياسىندا 740 مىڭ ورىندىق 369 مەكتەپ اشۋ جوسپارلانعان. بۇل ءوز كەزەگىندە اپاتتى جاعدايداعى جانە ءۇش اۋىسىمدى مەكتەپتەر ماسەلەلەرىن شەشەدى.
ۇلتتىق جوبانى ىسكە اسىرۋ ءۇشىن 2023-2025 -جىلدارعا ارنالعان رەسپۋبليكالىق بيۋدجەتتە 2,4 تريلليون تەڭگە قاراستىرىلعان. 2023 -جىلى 461 مىڭ ورىندىق 217 مەكتەپ قۇرىلىسىن باستاپ، ولاردى كەلەر جىلدىڭ سوڭىنا دەيىن پايدالانۋعا بەرۋ جوسپارلانعان. ال 2024 -جىلى 279 مىڭ ورىندىق 152 مەكتەپ قۇرىلىسىن باستاپ، ولاردى 2025 -جىلى اشۋ جوسپارلانىپ وتىر.
