جاپونيادا جەر سىلكىنىسىنە ءتوزىمدى ۇيلەر سالىنادى
استانا. قازاقپارات - تۇركيا ۇكىمەتى 2023 -جىلعى جويقىن ءزىلزالادان كەيىن قۇرىلىس ساپاسىنا جوعارى تالاپ قويا باستادى. بۇل تۇرعىدا جاپونيا دا قاتاڭ ساياساتقا كوشكەن. زەرتتەۋ بويىنشا كەيىنگى 50 جىلدا ءار 2 جىل سايىن ماگنيتۋداسى 8 بالدان اساتىن كەمىندە 1 ءزىلزالا تىركەلىپ ءجۇر.
ماماندار سەيسميكالىق قاۋىپتى ارتۋىگا گەوفيزيكا ەمەس، الەۋمەتتىك- ەكونوميكالىق فاكتورلار كوبىرەك اسەر ەتەدى دەيدى. بۇل ءبىرىنشى كەزەكتى جەر سىلكىنۋ قاتەرى جوعارى ايماقتاردا حالىقتىڭ تىعىز ورنالاسۋى مەن وسال ينفراقۇرىلىمنىڭ بولۋى.
دەسە الەمدە كەيىنگى 100 جىلدا جويقىن ءزىلزالالاردان وپات بولعاندار سانى 2 جارىم ەسە ازايعان. بۇعان وڭدى قۇرىلىس، قالا سالۋدى ءتيىمدى جوسپارلاۋ جانە قورعانۋ جۇيەسىنىڭ ارتۋى سەبەپ. سوڭعى دەرەككە سۇيەنسەك، جەر سىلكىنىستەرىنەن جىل سايىن 13 مىڭنان اسا ادام كوز جۇمىپ، 4 ميلليوننان استامى جارالانىپ، 12 تريلليون شىعىن كەلەدى ەكەن.
گرەكيادا ءزىلزالادان قاۋىپسىزدىك شارالارى كۇشەيتىلدى
ءدال قازىر گرەكيانىڭ سانتوريني ارالىنا ءزىلزالا قاۋپى ءتونىپ تۇر. بۇعان دەيىن 200-دەن استام جەر سىلكىنىسى تىركەلىپ ۇلگەردى. بيلىك بارىنشا قاۋىپسىزدىك شارالارىن كۇشەيتىپ جاتىر. مەكتەپتەر ۋاقىتشا جابىلدى. تۇرعىندارعا جابىق عيمارات ىشىنە جينالماۋ ەسكەرتىلگەن. ەۆاكۋاتسيالاۋ جوسپارى پىسىقتالدى. باسسەيندەردى سۋعا تولتىرۋعا تىيىم سالىنعان. سونداي-اق كەمەجايدان اۋلاق جۇرۋگە كەڭەس بەرىلدى. سانتوريني گرەكياداعى تانىمال تۋريستىك ورىن. جىل سايىن 3 ميلليون ادام ساياحاتتاپ بارادى.
تۇركيادا سەيسميكالىق قاۋىپسىزدىك تالاپتارى قاتاڭداتىلدى
ءجيى جەر سىلكىنەتىن تۇركيا عيمارات قۇرىلىسىنا باقىلاۋدى كۇشەيتتى. جاڭا ەرەجەلەر بويىنشا ءۇيدىڭ بەرىكتىگىن ارتتىراتىن ماتەريالدار مەن تەحنولوگيالاردى عانا پايدالانۋ مىندەتتەلگەن. اسىرەسە بەتون مەن ارماتۋرانىڭ ساپاسى - باستى نازاردا. حالىقارالىق ستاندارتتارعا سايكەستىك تە اسا ماڭىزدى. انادولى ەلىندە سەيسميكالىق بەلسەندىلىك جوعارى ايماقتاردا قابات سانىنا شەكتەۋ ەنگىزىلگەن. عيمارات تۇرعىزۋدىڭ بارلىق كەزەڭىن باقىلايتىن ارناۋلى كوميسسيالار قۇرىلدى.
سەيسميكالىق قاۋىپ جوعارى تاعى ءبىر ەل - جاپونيادا ۇيلەردىڭ ىرگەتاسى تەربەلىسكە يكەمدى ەتىپ سالىنادى. جەراستى دۇمپۋلەرىنىڭ ەنەرگياسىن جۇتۋعا قابىلەتتى امورتيزاتورلار مەن دەمپفەرلەر قويىلادى. قۇرىلىسقا جەڭىل ماتەريالداردى پايدالانۋ - مىندەت. بۇدان بولەك بارلىق جەردە تەربەلىستەردى الدىن الا سەزىپ، دابىل قاعاتىن جۇيە جاپپاي ورناتىلعان. مەكتەپتەر مەن باسقا مەكەمەلەردە ءزىلزالا كەزىندەگى ءىس-ارەكەتتەر بويىنشا ۇنەمى وقۋ-جاتتىعۋ وتكىزىلەدى.
24.kz
