جاپونيادا ءزىلزالادان سوڭ احۋال ۋشىقتى
جاپونيانىڭ پرەمەر-ءمينيسترى فۋميو كيسيدا دۇمپۋدەن جاپا شەككەن ايماققا ارنايى باردى. قازىر وڭىردە جاعداي ءماز ەمەس. ازىق- تۇلىك پەن اۋىزسۋ تاپشىلىعى ءوز الدىنا، ينفراقۇرىلىمنىڭ تۇگى قالماعان.
ال اۋا رايىنىڭ قولايسىزدىعى قۇتقارۋشىلاردىڭ جۇمىسىنا تۇساۋ بولىپ تۇر. جاڭا جىلدى قۋانىشپەن ەمەس، قورقىنىشپەن قارسى العان جاپوندىقتار ءۇشىن يسيكاۆا پرەفەكتۋراسى ءومىر سۇرۋگە جارامسىز ايماققا اينالدى. قازىر مۇندا تىرشىلىك ءنارىنىڭ تاپشىلىعى قاتتى بايقالادى. ەلەكتر جەلىلەرى ىستەن شىعىپ، مىڭداعان ءۇي جارىقسىز وتىر. جانارماي جەتىسپەۋشىلىگى جۇرتتى ابدەن تيتىقتاتىپ جىبەرگەن.
جىعىلعانعا جۇدىرىق، تۇرمىستىڭ ناشارلاۋى وڭىردە ينفەكسيالىق اۋرۋلاردىڭ ورشۋىنە اكەپ سوعۋدا.
- وڭىردەگى تۇرعىن ۇيلەردىڭ شامامەن %80- ىنە قاتتى زاقىم كەلگەن. كەي عيماراتتار سىرتىنان ءبۇتىن كورىنگەنىمەن، ىشىنە باس سۇعا قالساڭىز، تۇگى قالماعانىن بايقايسىز. ەرتەڭگى كۇنىمىزدىڭ قالاي بولارى بەيمالىم.
سوڭعى دەرەككە سايكەس ءزىلزالا كەزىندە وپات بولعانداردىڭ سانى 220-عا جەتتى. مىڭداعان ادام جاراقات العان، 200-دەن استامىنىڭ جاعدايى اۋىر. ءىزىم-عايىم جوعالعانداردىڭ سانى 200-گە جۋىقتايدى. ءازىر بريگادالىق توپ ءىز-ءتۇزسىز كەتكەندەردى ءالى ىزدەستىرىپ جاتىر. وڭىرگە ساپارمەن كەلگەن پرەمەر-مينيستر فۋميو كيسيدا ەڭ الدىمەن وسى قۇتقارۋ جۇمىستارىنىڭ قارقىنىمەن تانىستى. ايماقتى قالپىنا كەلتىرۋ ءىسىن ءوز كوزىمەن كورىپ، تۇرعىندارعا كومەك كورسەتىلەتىنىن تىلگە تيەك ەتتى.
فۋميو كيسيدا، جاپونيا پرەمەر-ءمينيسترى:
- ءزىلزالا كەزىندە زارداپ شەككەن تۇرعىنداردىڭ بۇرىنعى ءومىرىن قايتارۋ ءۇشىن قولدان كەلگەننىڭ ءبارىن جاسايمىز. ۇكىمەت بۇل ماسەلەنى نازارعا الىپ، كومەك كورسەتۋگە ءازىر.
مۇنان سوڭ كيسيدا ۋاقىتشا باسپانالارعا قونىستانعان حالىقپەن كەزدەستى. قازىر 20 مىڭداي ادام سپورت مەكتەپتەرى، قوعامدىق مەكەمەلەر مەن ۋاقىتشا عيماراتتاردى پانالاپ ءجۇر. ولاردىڭ جارتىسىنا جۋىعى - زەينەت جاسىنداعىلار.
فۋميو كيسيدا، جاپونيا پرەمەر-ءمينيسترى:
- تۇرعىلىقتى باسپانالار دايىن بولعانشا دەنساۋلىعى سىر بەرگەن كىسىلەر مەن زەينەت جاسىنداعىلاردى ۋاقىتشا قوناق ۇيلەر مەن پاتەرلەرگە ورنالاستىرامىز. بۇل - اۋرۋشاڭدىلىقتى تومەندەتۋدىڭ ەڭ ءتيىمدى ءتاسىلى. قازىر جاپا شەككەن وڭىرلەرگە ۇزدىكسىز گۋمانيتارلىق كومەكتەر جەتكىزىلىپ جاتىر. ال تۇرعىندارعا 32 ميلليون ا ق ش دوللارى كولەمىندە قارجىلاي قولداۋ كورسەتىلەدى.
www.24.kz
